J. G. M. Sheldon
Ma waena o na lahui kanaka a pau i hookahua ia ka nohona Kalikiano kanu ia ka anoano o ka naauao, ua punia na kihi eha o ko lakou mau aina kulaiwi me ke ala anuhea a me ke onaona liula e hiki ole ai ia lakou ke poina i ka hoomanao ana ae me ke aloha onipaa i ka inoa, na hana, a me ka moolelo o ka lakou mau kalaiaina i molia i ko lakou mau ola no ka ainahanau no ka pono a me na pomaikai o ko lakou mau hoa makaainana. Ke aui a ke alawa iki aku na maka o ko kakou mau hoomanao ana ma na paia o ke au i hala, e ike aku ana kakou i na helehelena o na kuhikuhipuuone, na loea, a me na alakai lahui o kela a me keia aina, mai ka palena hema loa o ka poepoe honua i ka welelau akau, a mai ke kukulu hikina hoi a na aekai i ke komohana, a me he la, ua hiki no ke ike ia ko lakou mau hiohiona ma muli o ke kukui lunaikehala o ka puuwai laahia o kela me keia hoa kanaka, no ka mea, He Pohakuhauoli ko Enelani, He Bisimaka hoi ko Kelemania, He Alekanadero ko Lukia, He Galibaladi ko Ikalia, He Kolomoboso ko Sepania, He Wasinetona ko Amelika, A he Nawahi hoi ko Hawaii.1 He nui wale aku no na loea o ia mau lahui a me na lahui e ae a me ka lahui Hawaii pu i hiki ke helu papa ia, aka, i aha ai hoi ka helu papa ana, oiai ua lawa ko Nawahi kulana a me kana mau hana no kona helu ia ma ke kahua o ka papa ekahi o ke aloha aina, ke aloha Alii, a me ke aloha lahui e like me na inoa e ae i puana mua ia aela E ninau iho—o wai la ka makaula o ke Kuikahi Panai Like2 E nana i ka moolelo o na haiolelo kue i ia kumuhana a e ike ia no, o ka mua loa, o Iosepa Nawahi ma Hawaii Hikina, a lohe ia akula ka leo o G. W. Pilipo, "Ka Liona o Kona Akau," ma Hawaii Komohana. O Nawahi a me kona kokoolua, Pilipo, na kilokilo a kuhikuhipuuone makaula o Hawaii nei na laua i puana ae keia mau huaolelo, " O ke Kuikahi Panai Like, o ia no ke keehina mua o ka hoohui aina, a ke ae ia keia kumuhana, o ka lilo ana ia o ke ea o ko kakou aina hanau." Kainoa hala, ua ike ia ka oiaio o ia kilokilo ana. O ka momi makamae i waena o na
Read this work at the World Public Library (library card needed).