Department of Education
Ua kapa ia na kanaka i pili ma ke kuauhau, he ohana. O ke kumu o ia olelo, he ohana, ka pilina ma waena o ke kanaka a me ke kalo, i hoike ia ma ka moolelo no Haloa. No laila i wehewehe ia ai ka ohana e like me ka ulu ana o ke kalo. O na oha na kawowo e ulu ana mai ka hua o ke kalo, a lilo i mau laau oo. O ka ohana ka puulu o na oha a pau o ke kalo. Aia ma ka ohana na kanaka a pau i pili ma ke koko. Ua pili like lakou i hookahi kupuna. Aia hoi paha na kanaka i pili ma ka male ana a me ka hanai ana. Pili hoi na hanauna ma ka ohana. Ua ikaika loa is pilina koko. Wahi a ka Hawaii, he pilina wehena ole. O na kupuna na lala o ka ohana i hala aku ma mua, a me na makule e ola nei. Ua pili ia huaolelo, he kupuna, i ka hua olelo kupu, pili no i ka ulu ana. He mau mea mahalo a aloha nui ia na kupuna e ka ohana. Ua noho hookahi o na kupuna ma ke kulana a o ia ke poo no ka ohana. O ka mea maamau, o ia kupuna ka hanau mua ma ka lala hele mua o ka ohana. Ua huli na lala a pau o ka ohana i ia kupuna hookahi no ke kokua ma ka hoopau ana i na hoopaapaa a me ka hooholo hoi ana i na pilikia. He mana no ko ka hanau mua. Eia nae, o ka mea nui, o ka hanau mua ke kumu o ka naauao a me ke kokua no ka ohana. Ua kahea ia na kupuna he mau hulu kupuna ma muli o ke kulana makamae o na kupuna, e like hoi me na hulu i haku ia ai na ahu ula a me na mahiole o ke alii. Oiai na ka makua ka hana ikaika, ka huakai ana a me ka hana hoohauoli, na ke kupuna ka hana malama keiki. Ua haawi ia na keiki hanau mua i na kupuna, na lakou e hanai. O ke keiki kane mua, na na makua o ka makua kane, a o ke kaikamahine mua, na ko ka makuahine. Ua pili no na kupuna i ka lakou mau moopuna.
Read this work at the World Public Library (library card needed).