Puke Heluhelu Iii
O ke kumu o ko Paao haalele ana i kona aina hanau, ua hakaka laua, me kona kaikuaana, o Lonopele. O Lonopele, o ia ke kahuna a he kanaka mana, he akamai, a he ike i kela mea, i keia mea ma kona ano kahuna; he mau kanaka mahi ai laua. O Lonopele, ua mahi ai o ia i kona aina a maikai, a ua kanu o ia i na laau hua ai he nui loa i loko o kona kihapai. I kekahi manawa, ua pau i ka aihue ia ka hua o na laau kanu a Lonopele ma kona kihapai, a manao ihola o ia, ua hele ke keiki a Paao e kolohe i ka hua o kana laau, no laila, hele maila o ia ia Paao, a olelo maila no ka pau o ka hua o kana laau i ka Paao keiki. Olelo aku hoi o Paao, “Ua ike pono no nae paha oe, ua pau io ka hua o ko laau i kuu keiki” Pane maila hoi o Lonopele, “Ua ike au i ka hele ana o ko keiki i laila, aole nae au i ike i ka lawe ana, aka, ua manao no nae au, nana no i kolohe.” Olelo hou aku o Paao, “Ina pela, e kaha ana wau i ka opu o kuu keiki, a i loaa ole kau hua, a laila, pehea” Olelo mai no hoi o Lonopele, “Aole iau ia, aia wale no ia i kou manao. I ka wa hea no la hoi kou ike ana e kaha ia ana ka opu o ke kanaka, a ia oe wale ae nei no ke kaha ia.” Pane aku no o Paao, “Aole, e kaha ana au i ka opu o kuu keiki, a i loaa ka hua, pono oe, aka, i loaa ole, a laila, ua hewa oe.” A no ka paa loa hoi o ko Paao manao e kaha i ka opu o kana keiki, no laila, kakaha ihola o ia i ka opu o kana keiki, aole nae i loaa kekahi hua i loko, no laila, kena akula o ia ia Lonopele e nana mai, aka, i maila nae o Lonopele, “Ooe no paha ke nana i ka opu o kau keiki.” A o ua Paao nei hoi, minamina loa ihola o ia i kana keiki, a olelo ihola hoi o ia, “E imi ana hoi au i mea e make ai kau keiki (ka Lonopele), a e ku hoi kau kumakaia, a e haalele au i keia aina.” No laila, kapili ihola o Paao i mau waa e holo ai, a paa na waa, he mau waa maikai loa, no laila, hookapu ihola o ia, aohe kanaka hele, aia a pau ka lolo ana o na waa.
Read this work at the World Public Library (library card needed).