James W. L. Mcguire
1938
He wahi moolelo pokole keia no ka hele ana o ka Moiwahine Kapiolani ame ke Kamaliiwahine Liliuokalani, no na hana hoohiwahiwa i ka Iubile o ka Moiwahine Victoria, o Pelekane, ka aina nona ka oleloia “ Aole e napoo ka la maluna o na palena aina o Pelekane. ” He lehulehu no ka poe i ukali aku ma keia huakai a na Lii, aka, ua hala aku lakou apau i ka make a koe mai nei maua elua—o ke Konela Curtis Piehu Iaukea ame ka mea e kakau nei i keia wahi moolelo pokole. Ua konoia ka mea kakau e hoopuka i keia moolelo e na makamaka lehulehu, a mahope o ka noonoo akahele ana ua ae aku la ka mea kakau ia mau nonoi hoomano ana, me ka hilinai ana e loaa ana i ka mea heluhelu kekahi mau pomaikai mamuli o ka heluhelu ana i keia moolelo. Aole e hiki i ka mea kakau ke hooiaio aku ua hemolele loa keia moolelo aole wahi hewa a kinaunau paha. Aia no he mau hemahema paha i ku ole i ka hoi o kekahi poe ; aka, e oluolu oukou e ka poe e heluhelu ana e hoomanawanui ia mau hemahema, a e uumi i ka inaina, a e lawe nihi ae no ma na mea i ku i ka iini a ka makemake.
Read this work at the World Public Library (library card needed).