Hawaiian Historical Society
A hiki mai la ka wa o ke kaua ana o Ka- mehameha me Namakeha, oia ke kaua o Kaipalaoa i make ai o Namakelia, i ka makahiki 1797, o na makua o Opukahaia ka i make pu iloko o ia kaua ana, a me kahi kaikaina uuku a Opukahaia, a pakele mahunehune wale oia nei. Ua aneane umi na makahiki o Opukahaia i kela manawa. Penei kahi moolelo a Opukahaia no ia mea. " Elua aoao i hoopaapaa no ka mana Aupuni o ia aina." (Oia paha o ko Kamehameha a me ko Namakeha.) " Hoouka ia ke kaua, a weliweli loa ka luku ana. Hoopioia ka aoao nona ka makuakane o Opukahaia, a, auhee nui aku. I ka lanakila ana mai o ko lakou mau enemi, lukuia no hoi ko laila mau kauhale. Eia nae, ua kukala e ia ka hoea lanakila ana mai o ko lakou poe enemi. Nolaila, hopu iho la ka makuakane i kana wahine, a me na keiki elua a laua, a holo aku la i ke kuahiwi. Malaila lakou i pee ai i kekahi mau la, iloko o kekahi ana. Aka, no ka nui loa o ko lakou pilikia i ka makewai, puka mai la lakou i kekahi la ae e imi i ka wai e inu. Loaa ia lakou kekahi wai mapuna e kokoke ana ilaila, a oiai lakou e inu ana, hoea hikilele mai la ka enemi. Ia manawa, ua holo koke ka makuakane, no ka pihoihoi o ka manao. Aka, ia ia e holo ana, uwe aku la kana wahine a me na keiki, a no kona aloha ia lakou, hoi mai la oia e kokua ia lakou. A i kona hookokoke ana mai ia lakou, ike ae la oia i ka enemi, ua kokoke loa mai, holo hou aku la oia. Ike ae la ka enemi i ka nui o kona aloha i kona ohana, hopu iho la lakou i kana wahine a me na keiki, a hooehaeha aku la ia lakou, i mea e hoea hou mai ai ka makuakane i loaa aku lakou ia ia. A ua ko no ko lakou manao. No ka mea, i kona lohe ana i ka uwe kumakena ana o kona ohana iloko o na lima menemene ole o ka enemi, aole hiki ia ia ke hoomanawanui hou aku, Hoi hou mai la no ia, a o ko lakou hopu no ia ia ia a pepehi pu ia ia me kana wahine. Ia manawa nae, lalau ae la o Opukahaia i kona wahi pokii a waha iho la, hoao ae la e holo aku i pakele. Aka, ua alualu koke ia a loaa, a make koke ae la kahi pokii i k
Read this work at the World Public Library (library card needed).