Kuleana Kope
1998
Eia la, ke panee ia aku nei keia moolelo no loko mai o na ulu ohia loloa ma kai mai o Panaewa a i uka la o Waiakea, he kaao no Kamapuaa, he kupua e kaulana nei a puni ka paeaina i kana mau hana kupaianaha me kona ano he akua puaa ku i ke aiwaiwa. No Kamapuaa, he kupua, he puaa, he kanaka; ike ia i loko ona na ano no hoi i paa i loko o kakou pakahi a pau, na hemahema me na ikaika o ke kanaka, he akamai, he kolohe, he apiki, he ikaika ma ke kaua, he aea, he pakela ai (he aiapuaa hoi), he lokomaikai, a he aloha kuhohonu i ka ohana. Ua nui na mana moolelo pili ia Kamapuaa. Kohu mea la, he moolelo ko kela me keia wahi pili ia Kamapuaa a me kana mau hana ma ia wahi. Ua kaulana loa hoi ka moolelo no ko Kamapuaa aihue ana i na moa a Olopana, pela pu no hoi ka pili kapekepeke o laua o Pele. Ua pai mua loa ia keia moolelo me ke pooinoa o He Moolelo No Kamapuaa, ma loko o ka nupepa olelo Hawaii o Ka Hae Hawaii. He nupepa ia i pai ia he hookahi manawa o ka pule ma na makahiki 1856-1861. Ua hoopuka pukaina ia keia moolelo ma na pule moekahi mai ka la 26 o Iune, 1861, a pau ma ka la 25 o Kepakemapa o ia makahiki no, a he 14 ka nui o na mokuna i loaa mai. Ua nui na moolelo hoihoi i pai ia ma loko o kona mau aoao, he mau moolelo no hoi a na mea kakau i nonoke akula i ka ohi a i hoopaa akula ma ka palapala. Na G. W. Kahiolo keia mana moolelo no Kamapuaa, a ua ike ia ko Kahiolo inoa ma na wahi e ae, e laa me Kukini Ahailono, Inoa No Na Laau a me He Mele No Ka Nupepa Kuokoa. He akamai hoi o ia ma kona waiho ana mai i neia moolelo no kakou, na pua e mohala nei ma loko o keia wa e ulu ae nei ka iini o ka lehulehu i ka malama makee i na mea Hawaii. Ua ike no paha o Kahiolo i ka loli nui o ka nohona e hiki koke mai ana ma kona wa. Auhea oukou e na kupa o ka aina, kuu mau hoa hanau o ka pupuu hookahi, na Hawaii e noho ana mai ka ipuka kumulani o ka la hiki ola i Hawaii a i Niihau e lana malie ana i ke kai e napoo molehulehu ai ka la kau, aloha kakou.
Read this work at the World Public Library (library card needed).