Lokahi Antonio
1995
I loko o kela okana aina oluolu o Enelani e hoopulu ia ana e ka muliwai Dona, ma laila kekahi ululaau nui i ka wa kahiko nana i uhi aku i ka hapa nui o na awawa a me na puu e waiho ana ma waena o Sefila a me ke kaona oluolu o Donekesata. O na koe o ua ululaau nunui nei, e ike ia no ia i keia manawa ma na noho hanohano o Wenewota, Wanalife, a me Rotehama a puni. Ma anei i holoholo ai i ka wa kahiko ke deragona kupua o Wenale; a ma anei no i hoouka ia ai ka nui o na kaua weliweli i loko o na kaua kivila ana i kapa ia ai ke kaua o na Rose; a ma anei no hoi i hoopunana iho ai i ka wa kahiko, na poe puali hoole kanawai kaulana o ka wa kahiko, no lakou na hana i maa mau i loko o na mele o Enelani. O keia ihola kahi nona ko kakou moolelo, a o ka manawa hoi o ko kakou moolelo, e huli aku ana no ia i ke au o ka hoomaka hou ana mai o Rikeke I e noho alii a hiki i ka hopena o kona noho alii ana, ma hope iho o kona pakele ana mai ka hoopaa pio ia. O kona wa i hoi mai ai mai kona hoopaa pio loihi ana, he mea no ia i ake nui ia ma mua o ka manaolana ia ana, e kona mau makaainana i hoonele ia; oiai, i loko o ia manawa, o lakou ihola na poe luahi o kela a me keia mau hookaumaha kuapapanui wale. O na poe alii nui i loko o ka wa e noho alii ana o Setepano, na poe alii hoi a Heneri II i hooemi iki mai ai i ko lakou mana ma ke ano hoolilo ana i kekahi hapa o ko lakou aina i ke aupuni.
Read this work at the World Public Library (library card needed).