Lokahi Antonio
1994
E noho ana ma kekahi wahi ma uka o Kohala, i kela au kahiko loa o ka aina, he kane me kana wahine. O ka inoa o ke kane, o ia no o Leimakani. A o ka inoa hoi o ka wahine, o ia o Hina. He loihi na la o ko laua noho ana me ka loaa ole o ka hua o ko laua noho hoao ana. O ka hana maamau i keia kanaka, o ia no ka mahiai uala ma uka paha o Honoipu. A o kana lawaia mau e hele ai, o ia no ka luu ula i kai o ia kahakai. Ia laua e noho ana me ka maikai, ua hoomaka maila o Hina e ono i ka niu. A o ka pilikia o keia ono a kana wahine, he kapu loa ka ai ana o na wahine i ia au o ka aina i ka niu. A ua hiki ole no ia Leimakani ke hooko i ka ono a kana wahine, oiai, he kanaka malama o ia i ke kapu o na akua o ia au kahiko o ka aina. A ma muli no o ia kulana o Leimakani, ua hiki ole ia ia ke ae aku e hooko i ka ono a kana wahine. Ua ulu maila nae ke ano hoohuoi i loko o Leimakani, he ano hookauhua keiki paha keia a kana wahine e ono nei, a ua waiho wale ihola no nae i ia mea i loko ona. Aole no hoi i loihi na la ma hope o kela ono ana o Hina i ka niu, ua kamailio hou maila no o ia i kana kane.
Read this work at the World Public Library (library card needed).