Kuleana Kope
He welina aloha i na kupa o ka aina e noho ana mai Hawaii Moku O Keawe, kahi e ike mua ia ai ka wehena kaiao, a i Niihau O Kahelelani, kahi e aui ai ka la i lalo o ka mole o Lehua. Ano, ke hoouna ia aku nei keia ohina moolelo o Lehua Ahihi i ka loa me ka laula o ko kakou paeaina, me ka manaolana e paipai a hoohoihoi i ka poe olelo Hawaii i ka heluhelu a pulama i na moolelo a na kupuna i waiho mai ai no kakou. Ma ko kakou noho ana he kanaka, ua nui na haawina o ka naau i ike ia i kela me keia la. Ua hoiliili ia ekolu moolelo ku i ke aloha walohia. Ke heluhelu ae oukou, e na makamaka heluhelu, e ike ana oukou e he mea nui no ka pili aloha ma keia mau moolelo ekolu o Makakehau, Kaala a me Kahalaopuna. Ma ka heluhelu ana no na hana a hanana o ia mau moolelo, e noonoo kakou i ka oiaio o ka olelo noeau Aohe kanaka i eha ole i ke aloha. O ia hoi, he mea ole ke kulana he ilihune, he waiwai, he naaupo, he naauao, he pupuka a he ui paha—ua ike no kakou a pau i ka eha i ke aloha, a i ole, i ke aloha ole ia paha. Ua pai mua ia keia mau moolelo ma ka makahiki 1904 e ka Hale Pai o Paradaiso o ka Pakipika. I keia wa, ua hoiliili ia na moolelo ekolu, a ua hoonohonoho ia he puke ohina o na moolelo nui ekolu i loaa mai Paradaiso Pakipika mai. He nani hoi kau ka olelo ma na moolelo, a hiki no ke ike i ke akamai olelo Hawaii o na mea kakau. E nanea hoi ko oukou heluhelu ana, a e imi mau i ka naauao Hawaii e malama ia nei i loko o na moolelo he nui a lehu a na kupuna. E o mau mai ka leo ao a na kupuna, e maliu aku kakou o hala ka Puulena. O ke aloha mao ole, me he ua mao ole la o ke Kanilehua.
Read this work at the World Public Library (library card needed).