S. N. Hale'Ole
Hoao ia o Kahauokapaka me Malaekahana No ka olelo paa a KahauokapakaImi o Malaekahana i ke kahuna e pakele ai Hanau a huna ia o Laieikawai me LaieloheloheImi aku o Hulumaniani i ke anuenue pio o Oahu I ke kamailio ana i keia kaao, ua olelo ia ma Laie, Koolau kona wahi i hanau ai, a he mau mahoe laua: o Kahauokapaka ka makua kane, o Malaekahana ka makuahine. O Kahauokapaka nae, o ia ke alii nona na okana elua o Koolau Loa a me Koolau Poko. Aia ia ia ka mana nui ma luna o kela mau okana. I ka manawa i lawe ai o Kahauokapaka ia Malaekahana i wahine male nana (hoao), ma hope iho o ko laua hoao ana, hai mua o Kahauokapaka i kana olelo paa i mua o kana wahine, o laua wale no ma ke kaawale, oiai i loko o ko laua mau minuke oluolu, a eia ua olelo paa la, "E kuu wahine, he nani ia ua male ae nei kaua, a no laila, ke hai nei au i kuu olelo paa ia oe. I noho aku auanei kaua a i loaa ka kaua keiki, a he keiki kane, a laila, pomaikai kaua, ola na iwi i loko o ko kaua mau la elemakule a haule aku i ka make, nalo no hoi na wahi huna. Na ia keiki e nai na moku e pau ai ke loaa hoi ia kaua ke keiki mua, a he keiki kane. Aka hoi, ina he kaikamahine ke hanau mua mai, a laila, e make, a ina he mau kaikamahine wale no ka kaua ke hanau mai, e make no. Aia no ke ola a hanau mai a he keiki kane, ola na hanau muli ina he mau kaikamahine."
Read this work at the World Public Library (library card needed).