Joseph M. Poepoe
Ma ka hooponopono hou ana a me ka hana ana i ka hoakaka Kanawai mahope ae nei, ka mea hoi a ka Mea Hooponopono i kapa ai he Alakai Kanawai, aole no i manaoia ua hololea loa na mea a pau me ke kinaunau ole. O ke kumu alakai nui o keia mahele, o ia no na hoakaka kanawai i kakau mua ia ai e ka Mea Hanohano A. F. Judd, Lunakanawai Kiekie a Kaulike hoi o ke Aupuni, a i hoopuka ia ai maloko o ka Nupepa Kuokoa, e hoomaka ana paha ma ka malama o Ianuari, M. H. 1878. Ua hoao ikaika ka Mea Hooponopono iloko o ka nawaliwali o kahi malamalama ike Kanawai i loaa iaia, e hookomokomo aku i kekahi mau mea hou ma ua mau olelo hoakaka la, a pela hoi me ke kapae ana ae i kekahi mau mea i kupono wale no ma ka wa i hoolahaia ai ia mau mea ma ka nupepa, a i kupono ole hoi ma ka buke, a ua hana ka Mea Kakau pela, aole ma ke ano e kinai i ka io maoli o na mea i hoakaka mua ia, aka, i mea wale no e hiki ai ke hoaiai ae i kona malaelae maikai ma ka heluhelu ana a me ka hoomaopopo ana. E ikeia auanei ua mahelehele ia na olelo hoakaka, ma na mokuna a me na pauku, i hoomoakakaia me na poo manao ano nui me kekahi mau kuhikuhi Kanawai. Ma keia mau olelo hoakaka, ua hahai no ka Mea Hooponopono e like no me na mea i hoopuka mua ia, oia hoi mai ke Kanawai aku a hoea i ka mahele hope i puka ai maialo o ke poo "Ka Waiwai Paa." Ma ka manao nae o ka Mea Hooponopono, e loaa ana no he waiwai nui i na Lunakanawai, na Loio a me ka poe ake ike a pau mawaena o na Hawaii ike ole i ka Olelo Enelani, mailoko mai O keia mau hoakaka. I mea e hololea ai ka hoomaopopo ana i na olelo hoakaka mahope ae nei, ma ka aoao a ka mea heluhelu i keia buke, he mea pono ke hoolako oia iaia iho me na Buke I me II o na Olelo Hooholo o ka Aha Kiekie, ma ka Olelo Hawaii, ka buke o "Na Kanawai i Hoohuihuiia," a me ke Kanawai Karaima, a e loaa no keia mau Buke ma na Keena o ka Aha Kiekie a me Kalaiaina. E hoomanaoia ma ka nana ana i keia Mahele, e ikeia ana he kuhikuhi ana ma ka Mahele I., a o ia no ka Mahele I. o keia Buke, a pela n
Read this work at the World Public Library (library card needed).