Giuseppina Spadaro POESIE ************ INDICE: - L'ALBIRU - CANNALUVARI DU' ME' PAISI - SICILIA AMATA - SI NON SI' CUNTENTU - 'U STHRITTU DI MESSINA - LI PETRI PARRANU ********************* L'ALBIRU E' l'albiru prudigiu di natura ... li radici vhi stannu sutt'a terra e li rami chi 'nchiananu 'nto celu ... Iddu porta li nidi di l'aceddi e pi nui matura tanti frutti ... Pi li cosi di casa dugna 'u lignu e lu carbuni chi servi 'nto bisognu ... Di la terra é gran binifatturi ... e pi nui 'u criau lu Signuri ... L'albiru é 'a vita di lu munnu e non si stanca mai di fari beni ... Ma l'omu ruinàu la natura cu 'na cosa chi si chiama "nquinatura" E l'albiru chi soffri 'stu turmentu subbitu 'ssicca e piniannu mori ... ************ CANNALUVARI DU' ME' PAISI Musica di chitarri e mannulini 'ccumpagnavunu i maschiri 'nte sthradi ... Eranu maschiri cu vesti povireddi racimulati 'n casa 'nto casciuni ... I masculi si vistivunu di fimmini e i fimmini si vistivunu di masculi ... Quasuni vecchi scialli di so' nonna ... pezzi 'nta facci cu du' purtusa all'occhi ... scappi 'i suddatu bastuni a' 'mmani 'nguanti ' cuttuni ... E tutti allura eranu cuntenti puru si 'ccera picca di manciari ... E 'ccera tanta festa 'nto paisi e da' matina a sira si sunava 'u tammureddu ... Pi ottu jorna si curria ... si cantava ... si ballava ... si puisiava ... e guerri comu oggi non ci nn'era ... l'omini disonesti eranu rari e a nuddu ci vinìa lu pinseri d'annari jennu jennu pi rubbari ... Caru cannaluvari di 'na vota ... 'nta lu me' cori ci sì sempri tu ... e mi veni di ciànciri pi tia picchì oggi non c'è 'cchiù puisìa ... ******************* SICILIA AMATA Sicilia bedda e amata cantata e disprizzata ... tu si la terra di li cosi 'ntichi ... tu tanti nomi avisti 'nta la storia e fusti sempri centru di la gloria. Centru di li pueti e di li ciuri tu fusti sempri giardinu dill'amuri ... Sicilia cara terra di lu suli e di lu sali ... 'U suli chi riscadda tutti i cori 'U sali chi li pinseri fa divintari amari ... 'A luna arreti i nuvuli si 'mmuccia e cianci puru ... pi li cosi brutti chi succedunu oggi 'nta sta terra puru si ancòra 'cca non c'é la guerra ... E 'sta terra ch'era stidda di lu mari di li svinturi Diu l'havi a scansari ... ******************** SI NON SI' CUNTENTU Si non si' cuntentu cerca di cantari ... ma iò non sacciu si tu 'u sai fari ... Scuta 'a canzuna di lu ventu e lu cantu di lu mari ... Così ti passa lu turmentu chi ti sthrazia e ti cunsuma 'u cori ... Puru aceddi ti ponnu ricriari quannu 'a matina si mettunu a cantari ... Ma si puru 'na nota ti niscissi di lu cori purrìa 'nchianari 'n celu unni 'u Signuri ... Allura 'a nota diventa 'na canzuna chi Diu ricogghi e pigghia 'nte so' mani ... E poi ... Ti la fa scinniri 'nto cori ... ************************ 'U STHRITTU DI MESSINA Si cunta e si ricunta chi 'nto sthrittu di Missina nasceru li sireni di lu mari ... E chistu é u mari 'cchiù beddu di lu munnu e Colapisci 'nni fici lu so' regnu ... A' sira ... Quannu 'a luna nesci fora e 'llùmina 'u paisi 'ncantaturi ... li pueti ci cantanu l'amuri e l'artisti ci dannu lu culuri ... Riggiu e Missina si vidunu 'nto mari quannu 'a notti ci sunnu li lampàri ... Sbattuti sunnu l'unni d'a risacca menthri lu celu é tuttu un mantu d'oru ... Passa lu ferribbottu 'lluminatu ... E comu un sognu passa ... E poi scumpàri ... 'U nosthru mari é ancòra "u nosthru mari" e non c'é nuddu chi 'nnu po' rubbari ... ****************** LI PETRI PARRANU 'Cca e 'dda 'nta nosthra Sicilia ci su' rùdiri di vera 'ntichità ... Chi 'nni ricordanu 'i tempi già passati quannu 'ddi petri eranu città ... Palazzi e casi di l'antica genti chi si pérdunu 'nta notti di li tempi ... Si senti un cantu sthruggenti d'amuri chi ti gira attornu e ti trasi 'nto cori ... E di ddi petri nesci un versu di puisìa chi 'nni porta tanta malincunìa ... E sunnu vuci chi si sentunu vicini e ti parranu d'i tempi assai luntani ... E silinziusi cantanu picchì non vonnu essiri scurdati ... Picchì si sentunu di tutti 'bbannunati ... Passa lu ventu 'ntra li fissuri di li petri 'ntichi e ti passa vicinu ... E pari un sonu liggéru di viulinu ... E ddu sonu ... chi si sprigiuna da li ruvini eterni passa 'ntra li sintéri senza sthradi ... Passa n'tra li muntagni e li vallati ... 'Nchiana 'nto celu ... 'Ttraversa lu mari E poi ritorna ancòra ... E tu senti cantàri ... E ddu cantu ti dici ch'ammenzu a 'stu munnu senz'amuri ... Forsi ... Megghiu li petri sannu amari ...