http://www.voiceoforomiyaa.com/poem3.htm
KUTAA TOKKOFFAA

(UNSURUU SHEEKAA)

Ganni dabreetiin birraan bari'ee
bubbee adoolessaatiin rooba ari'ee
garbuulleen gaaree haamamuu gahee

(1)
boqollaan furrii goyfatee asheeta tahee

(2)
Yeroo akkanaa gaaf tokkoo
oorruu eeguudhaaf na ergan abbaaf haati koo

Gandi keennalleen gaararraa fagoo
nu maddii hin irtuu qamaleen hoongoo

Jaldeessilleen ka jiru qarree
wanni nu dhibaa jeedalaaf saree
ka boqqollaa weeraru taree taree
tiiyseen horiillee ta waaqni abaare
oorru'ggadhiifti saawwaniif harree

oorruu ufii eeggachuu baannaan
halkanii guyyaa dammaqee abbaan
dhufuu dandeetti hoongoon
baashee mashaqqaa rakoon gugurdoon

(3)
kana na gorsan yoomuu aayyoof aayguddoon

Oorruu teenna ta ardaa gamaa
dhaqee naannahee yoo takkaa lamaa
fagotti ufirraa laalee loowwan ka ormaa
oorruu garaachallee seenee toohadhee
hamtuun hin jirtuu eegan hubadhee
xinqishaa nyaachUtti seenee caphsadhee

Karatu oorruu maddii baasaa lagattii
bishaan waraabuuf caancoo dhaqattii

IBSA
Jechoota tokko tokko ka Oromoon hundi beekuu dhabuun malu armaa gaditti
ibsa. Lakkoofsa 1, 2, 3...... jedhee barruu keessatti akkuma kaahetti fudha.

1. Garbuun gaare:- Jechuun goguuf qophaahe jechuu. Midhaan hin facaasan. Ni
biqila. Ni dhala. Humna godhata. Hin hudha (Daraaraa isaa afaanitti qabatee
qophaaha). Garbuun, qamadiin, hayisaaniff kkf ni salban (daraaraa alatti
baasan). Eegasii cumaa raran (Milky stage). Eegasii ni asheetan. Ni GAARU.
Itti aansanii ni goganii haamaman.

2.Boqqollaan wayta garbuun salbu Shaabbee darba (Abaaboo isa dhiiraa, kan
mataa gubbaa san baasa). Dhukoo godhata (Isa booda firii kennu, seenxii
baasa). Seenxiin humna boqoollorratti baate jajjabaattee BOQQOLLOON FURRII
DARBITI (Silking stage). Daraaraan kun isa DUBARTIITI Eega awwaarri
dhiiraa SHAABBERRAA itti bu'e dhukoon (mataan boqqoolloo) firii baasa.
Yeroo akkanaa FURRIIN ni goga. Boqqolloon asheetuuf qophaahe jechuudha.

3. Naannoo an dhaladhetti beelaan BAASHEE jedhu. Mashaqaalleen rakkoma.

4. Caancoo jechuun madda bishaanii xiqqoo isiiti. Ta yoo kaan goydu yoo
kaan jiitu.

5. MAAXARUU : Yeroo baay'ee horitu huccuu (wayaa) maaxara. Alanshanii
cicciru, asii achiin qaawa itti baasanii. Armatti oduu akka isin hin
hordofne bakka bakkatti isin jalaa faffacaase jechuuf itti fayyadame.