Jean-Henri FABRE 

LI TÈSTO-D'ASE


.o0o.


I 
Li ribo di fangas, quand vèn lou mes de mai, 
Soun farineto tousco e molo. 
Aqui se vèi courdoun loungaru mai-que-mai 
De lano negro que tremolo. 
De-qu'es ? Belèu lou fiéu desfa d'un vièi debas 
Que gardo si maio frisado 
Pèr l'aguio. Mai noun, e nous enganan pas : 
De la Grapaudo es la nisado. 
D'abord lou fiéu se gounflo en capelet sinous ; 
E pièi, dins uno matinado, 
Un fum de tèsto-d'ase espelis de si nous, 
Lèu couva pèr li souleiado. 
II 
Pèr dire que soun bèu, nani ! 
Alucas-lèi : lis avani 
An bouseto tiblado en goubiho de pego, 
Mourre fendu dessouto en bè, 
Coume aquéu de l'espino-bè, 
Pitre d'argènt, e pièi co plato que boulego. 
Vaqui tout. E pamens, bessai, 
La vido es bono que-noun-sai 
Pèr li mignot, vesti de viscouso coudeno. 
Lou demande à quau li veira, 
Alor qu'en ribo arrengueira, 
Se souleion l'esquino e la roundo bedeno. 
Lis umble soun pas lou plus mau 
Approuvesi. Lou cacalau, 
Que, li tres quart de l'an, en benurous roupiho, 
A pèr éu lachugo, blasin, 
Partido fino entre vesin, 
Lòngui meditacioun au founs de la couquiho. 
Mancariéu segur de lesi 
Se falié noumbra li plesi 
Dóu paure verme nus, tripaio que camino ; 
E dir si joio d'avé 
Un tros de petourlo d'avé, 
Pèr tresor, dins soun pous afranqui de famino. 
Maire Naturo se fai lèi 
De douna part de si bebèi 
A tout ço que nourris de si roubusti pousso ; 
Emé lou plesi nous endor 
E vesèn pas veni la mort 
Ounte, à cha pau, sou poung brutalamen nous pousso. 
Douc li tèsto-d'ése pegous, 
Coume lis autre soun urous 
De la vido. Au soulèi nado, eici pèr floto ; 
Eila prenon lou fres, cubert 
Pèr lou tapis d'aquéu péu vert 
Que, dins li aigo founso, en lòngui mecho floto. 
N'óubliden pas lis àutri doun : 
Pantaion de mourre-bourdoun 
En limo caudo, van fourfouia la becado, 
Devènon gros, soun trefouli 
Quan sènton li pato espeli. 
Ma fisto ! soun urous, e la vido es amado. 
III 
Ah ! sias urous, vous-autre ! Esperas... Lou soulèu, 
Ardènt de mai en mai, vous fai vesito, e lèu 
L'aigo dóu valadoun demenis, esbegudo. 
La ribo se desseco, estrechido à cha pau, 
E lou fangas finis pèr n'èstre plus qu'un trau 
Ounte, se tirassant, la nisado es vengudo. 
En un soulet mouloun amassa comme acò, 
Esquicha l'un sus l'autre e remenant la co, 
Li tèsto-d'ase fan si darrié badai. Maire ! 
Maire Naturo ! un pau de plueio pèr eici, 
Quatre degout de rèn, e lèu, senoun veici 
Que tóuti periran dins uno ouro, pecaire ! 
Mai de raisso, n'i'a ges, nàni. Pèr li peissoun, 
Plòu sus la mar, à bro ; plòu pèr éli que soun 
Dins lou toumple sèns founs dis aigo inmènso. L'erso, 
Qu'a jamai set, reçaup li plour di novoulas, 
E la tepo patis. Quand lou campèstre, ai ! las, 
S'avanis de secun, plòu sus la mar que verso. 
Folo maire ! es ansin que samenes lou bèn : 
A l'endrudi, lou tout ; à la pauriho, rèn. 
Li tèsto-d'ase dounc, sus la bouiaco tousco, 
Crèbon, grasiha. Rèsto un orre chapladis 
De macaduro negro e de vèntre pudis 
Qu'emé de long vounvoun agarisson li moùsco.