Jean-Henri FABRE 

LI BERICLE DE VASCÒ


.o0o.


Pèr èstre un brave chin, lou siès, ségur Vascò ! 
Emé tant de biais portes roupo 
De sedo negro sus la croupo, 
E boulegues tant bèn lou rampau de ta co 
Quand tubo davans tu l'escudello de soupo ! 
Res dira pas de noun : o siés un bèu chinas, 
Emé l'auriho que tirasso 
Si frisoun de longo filasso, 
Emé lou pitre rous d'un rigau, e lou nas 
Grana, negre, lusènt ansin qu'uno rabasso. 
Acò 's rèn. As bèn miés. Sus tis iue parpelous, 
Bounias e pensatiéu, te vese, 
En liogo d'usso, dous gros cese 
En belugo de fiò , dos taco de péu rous. 
Es li bericle d'or d'un filousofe, crese. 
Lou sariés, filoùsofe ? O, lou siés, e bessai 
Dounariés leiçoun à toun mèstre 
Pèr se trufa dis escaufèstre 
E di marrìdi gènt. Sènso ni houi! ni hai ! 
Autant vite que iéu rejougnes sant Sivèstre. 
Se l'embourigo es caudo e se lou vèntre es plen, 
Que t'enchau l'emboui de la vido ! 
La ventresco en round espandido, 
Lou nas souto la co, mesclant li dous alen, 
Di chavano dóu jour espères la finido. 
Atèndes paciènt, roupihes tranquilas ; 
E se perfés de la racaio 
Lou cop de pèiro te travaio 
Li costo, acò 's pas rèn : pèr suprème soulas, 
Alor, la pato en l'èr, coumpisses la muraio. 
Aquelo pato en l'èr, signe de toun mesprés 
Dis auvàri de la vidasso, 
En sagesso, crèi-me, despasso 
Tout ço que lis ancian jamai nous an arprés : 
Vaqui coume dóu mau lou boulet se tirasso. 
Vaqui, moun filousofe, uno responso au mau 
Que toun mèstre souvènt envejo. 
Aro que l'aveni negrejo, 
Dins ti bericle d'or laisso-me vèire un pau 
Lou mounde enebria d'un vinas qu'amarejo.