Jean-Henri FABRE 

LOU GRAPAUD 


.o0o.


Oh ! filousofe di fangas, 
Tu que tirasses ta bedeno 
De maton en mato de jouncas, 
E de la pato, au fres, t'alisques la coudeno ; 
Oh ! boudenfle e viscous grapaud ; 
Sian de lesi, jouncho finido : 
Entre ami, charren dounc un pau, 
E digo-nous ço qu'as dins ta closco aplatido. 
Ancian tèms, dison que Platoun, 
Un capoulié de la paraulo, 
Em'un flasquet dóu bon cantoun, 
Sóupilavo de-fes, à la vesprado, à taulo, 
A questiouna sis envita. 
La coupo en man à chasco pauso, 
La saberudo soucieta 
Disié lou Bèu, lou Bon, lou Verai di causo. 
Faguen ansin. — De-ques lou Bèu ? 
— Pèr iéu, lou Bèu es la grapaudo. 
Rèn, souto la capo dóu cèu, 
La vau, quand au printèms a pres sa jauno faudo 
E sa baveto blanco. Noun, 
Rèn vau sa peitrino boufado, 
Si pato poupudo, que soun, 
Lou dirias, facho au tour pèr li man d'uno fado. 
Pèr la vèire un moumen, pauras ! 
De-sero, au dardai dis estello, 
Sorte plan-plan de moun clapas 
Et d'un ciéucle de braso atube mi parpello 
Acò 's pas proun de la bela 
De liuen : moun pitre crentous auso, 
De sa voues rauco, rampela 
La superbo grapaudo au maset de ma lauso. 
— Passen. lou Bon de-qu'es pèr tu ? 
— Pèr iéu, lou bon es la barboto. 
S'es grasso à lard, a la vertu, 
Sénso m'assadoula, de me metre en riboto : 
Es melico pèr lou perus ! 
Acò douçamen vous gatiho 
De-long ounte lou ruscle prus 
E deliciousamen dins lou gavai s'esquiho. 
Es bon peréu lou grihet brun 
Que destousque foro sa baumo ; 
Es bon, quand volo au calabrun, 
Lou tavan-merdassié, que sènt lou musc qu'embaumo. 
Despichous es pas moun defaut : 
Me regale emé la racaio 
Di poucelet que prenon sau 
Au supètre susa pèr li vièii muraio. 
— Vai bèn. E pièi, qu'es lou Verai ? 
Que n'en pènses dins ta cabosso ? 
— N'en pènse rèn ; pamens dirai 
Un mot aprés d'un vièi qu'avié roula sa bosso : 
De ço que nous regardo pas, 
Disié, nous roumpen pas la tèsto, 
Car nifla plus liuen que soun nas 
Es marrit i grapaud ; pichot, es uno pèsto. 
Niflariés plus liuen, tu, l'ami, 
Mourre pelous, faço paloto ? 
Pèr bèn dina, pèr bèn dourmi, 
As lou Bèu, ta grapaudo, as lou Bon, ta barboto ; 
E te fau mai ! Dins li fangas, 
Li tèsto-d'ase, ma famiho, 
Te tratarien de bedigas 
E dirien : Qu'es aquéu qu'a tout e que rouviho ? 
Escouto, lou mourre pelous, 
Brave grapaud : de ta sagesso 
De-fes, segur, sariéu jalous 
Quand la fougno me pren en de jour de tristesso. 
As la santo simplecita 
Dóu bestiàri que fai ripaio, 
Caligno e niso, esvedela 
Dins lou fres de la bouvo o la caud de la paio. 
As lou nescige benesi, 
L'indiferènci tranquilasso 
De tout, foro de ti plesi ; 
Te demandes jamai ço que tant nous alasso 
E, pecaire ! tant nous gausis 
A rambaia. Souto ta lauso, 
La verita jamai lusis. 
Que t'enchau lou Verai e la resoun di causo ? 
Aquéu soulèu n'es pas lou tiéu. 
Se de l'autre la calour raio 
Pèr tu, grapaud, coume pèr iéu, 
Lou soulèu dóu Verai trelusis e dardaio 
Rèn que pèr l'ome. Lou tavan 
E lou grihet soun ta pasturo ; 
De verita mai que de pan, 
A mens d'èstre grapaud, l'ome fai nourrituro.