Ives ROQUETA

La Paciéncia (extrait)


***************


L'AUBA PRIMIÈIRA
Se podiá pas pensar a quicòm mai qu'a una ròca rebalada longtemps per un rèc puèi d'un còp abandonada a flor de tèrra, ras d'un camp. Lo caratge èra blanc e gris, manjat per l'ombra que dançava, aquí rafit, aquí tot lis, estranhament contornat per la lutz. Avián pausat lo cap sus una coissinièira, la maissa retenguda per un flòc de petaç e davant de se refregir aviá rispat un bricon sul costat, dins una pausa suava e ara la clartat del ciri lo preniá de galís, caminant entre traucs e gibas, curant las regas sus las gautas, bordelant lòng del front cap a las ussas en bartàs, las parpèlas redondas, sens ges de cilhas, la boca cordurada e coma luònta ja de tant que semblava menuda. Una lutz d'inutila ironiá sus una cara enfin tornada al mineral, a son òrdre de sempre mai, barrada, sarrada, inabenabla.
-- Inabenable, pensèt l'abat Florent. E lo mot se metèt a li trepar pel cap. « De son vivent semblava malautós, dins quauquas mesadas aurà pas ni fòrma ni nom, deman se pòt que pudirà. Mas ara sembla inabenable. »
Un relòtge piquèt de l'autre band de la paret, dins son esquina. Pic e repic. Longtemps. Uòch oras ? Nòu ? Al cap d'un brieu ausiguèt totjorn en darrèr d'el un rebaladís de passes, de voses a la chut-chut. De mond dintrèron e d'autres qu'èran dins la cambra se levèron per lor far plaça. 
S'èran deguts metre d'acòrdi, una ora tu, una ora ieu, e d'aquí a deman. 
Aguèt pas un agach per eles.
Pensava a aqueles clapasses escampilhats pel cauce, a aqueles tropelasses de pèira que semblan chorrar de pertot: la pèira li tornèt que fa front al contorn del camin, dins lo veire de l'autò--quilhada, cada còp la meteissa, e imprevista cada còp, imprevisibla e que fa paur; e las lausas tanben enrasigadas dins la tèrra, lo morre al bòn de l'èr e que quora las arrancas ne sortís un sant-fum de bestiòtas, espaurugadas per la lutz e qu'engulhan forra-borra lo primièr trauc que trapan.
Un poiridièr. Un poiridièr, pensava, e la vergonha l'agantava. N'auriá plorat.