Loïsa PAULIN

L'Escalièr de Veire (extrait)


****************


CAT
Cat, d'ont venes, cat ?
-- Veni del pus prigond de la nuèch
de m'amusar sens bruch
amb lo vent e amb la luna.
Cat, d'ont venes, cat ?
-- Veni de m'agusar las dents
a l'aur del solelh levant,
amb las arpas l'ai cardat.
Cat, d'ont venes, cat ?
-- Veni de me lecar lo pel
jos la pluèja de gotas d'aur
e n'ai la borra que lusís.
Cat, d'ont venes, cat ?
-- D'un païs de silenci
que dormís dins lo fons de mos uèlhs
a l'abric de mas parpèlas.
Cat, d'ont venes, cat ?
-- D'un païs que ne soi rei
ieu ne veni, i anetz pas,
i anetz pas, domaisèla !