On Telpochtli Yejwan Omojkatsajtsik: —¡Yowajlaj on Kokoyotl!


Se tonajli sen telpochtli ne ipan on tepetl kampa yejwa tlajpiyaya sanoyej tlatsiwiya pampa san iselti ompa nemiya. On telpochtli ijkin okinemilij: —Nejwa nitsajtsis niman nikijtos: —¡Yowajlaj on kokoyotl!
San nisiu otekipanowaya sekimej tlakamej yejmej okakej on telpochtli ijkwak otsajtsik:
—¡Yowajlaj on kokoyotl!

On tlakamej okajkajkej on intekiu niman omotlajtlalojkej para kipalewiskej on telpochtli. Ijkwak oajsikej itech, okitakej ika xmelawak. Okwalankej, niman okajwakej. Niman on telpchtli san okimpakawetskilij. Kemaj on tlakamej oyajkej okitatoj on intekiu.

Ika opa on telpochtli otsajtsik:—¡Yowajlaj on kokoyotl!

Niman on tlakamej oksejpa okajkajkej on intekiu, niman omotlajtlalojkej para kipalewiskej on telpochtli. Ijkwak oajsikej itech, oksejpa okitakej ika xmelawak. Okwalankej, niman oksejpa okajwakej. Yejwa san okimpakawetskilij. Kemaj on tlakamej oyajkej okitatoj intekiu.

Ika yexpa on telpochtli otsajtsik: —¡Yowajlaj on kokoyotl!

Ijkwakon on tlakamej xok okichiwilikej kwenta, nion oyajkej ne kampa yejwa nemiya. Niman ijkwak melawak owajlaj on kokoyotl, sano ijki otsajtsik: —¡Yowajlaj on kokoyotl niman kiminmijmiktijtikaj noborregos!

On tlakamej xoyajkej kampa yejwa nemiya pampa opa yokinkajkayajka, niman ipan in vuelta on kokoyotl melawak okiminmiktij on borregos.

Kemaj on telpochtli onotlajkal ipan tlajli niman opeu ajmankachoka.