Eduardo de Filippo

L'enemì

* * *

"Carmenella Benvenuto,
a sapíte, 'a pezzecata,
'a nepote d' 'a malata
ca se cura l' "enemì"...

ca pè bbia d' 'e svenimente
fa na cura rinfurzata
ca si chiamma... ce l'ha data
nu duttore... Vítamì!

Fa miracule sta cura:
sò sserenghe introvinose
ca nun songo dolorose...
mò m' 'e faccio fà pur'i'!

Tengo sempe nu delore,
cumme fosse pesantezza...
na patàna e na stanchezza
c'accumencia dall'occí...

Dunque... E mò chi se ricorda
che dicevo... Uh, santa Rita,
me sò proprio rimbambita!
'A vedite, l' " enemí" ? "