Eduardo de Filippo

'E BBALICE 




Sto facenn''e bbalice. 
Me so' mmiso 
a scartà' carte, 
lettere, ritratte, 
tutt''e commedie ca nun aggio scritte, 
e ccose belle ca nun aggio fatto: 
ccà stann''e fessarìe, 
ccà stann''e fatte. 
Ma che me porto, 
che m' aggia purtà'? 
Tu, quanno parte 
Pe' stu viaggio luongo, 
ca nun saie si accummencia 
o si è fernuto, 
comme puo' dì': 
" Me porto appriesso 'e fatte ", 
oppure: 
" Mo me porto 'e fessarìe"? 
Io me nce songo miso 
c''o penziero 
e, 
'a verità, 
ve dico chiaro e ttunno, 
aggio ditto: 
" Mo faccio a capa mia: 
me voglio purtà 'e fatte a ll' ato munno, 
e llasso nterra tutt''e fessarìe".