Notte sbèteca

Achille Serrao

******

Agli amici di via Bisentina

Pò maje fernì sta notte perchiepétola
si nce aunìsce nu sbarià 'e viento ma liéggio
'e sciate spunte a vvino sott'ê fronne
vèrde furàsteco antico... Dicimmo pe' parlà
allariàmmo parole, vrénzole
'e jastemme p''a lampa ca nu torna
chiéna a chi adda turnà.

Brìnnese â sciorta, cumpagnélle, brìnnese
a na felèra 'e juorne, n'antecòre...
dicimmo pe' parlà figliemo nun se struje
'ncopp'ê libbre chist'anno e na muscella
se nne more, che vulite sapé, 'o pesone
'e casa... stezzèlla cu stezzèlla 'a mùmmara
se regne e 'a morte ammappucèa
chi s''a fida 'e guardà... int''a ll'uocchie. Allariàmmo
parole, 'a verità, c''e sciate spunte a vvino sott'ê fronne
vèrde furàsteco antico dint'a sta notte
sbèteca, cumpagnélle
nu brìnnese addò va.