Chiantàjeno - fernute 'e suonne

Achille Serrao

********

Chiantàjeno - fernute 'e suonne...
chiàntano ciéuze 'nnante 'a casa mia e nun se vede chiù
'a campagna - vaco crescenno figlie, ancora...
'nnant'â casa mia se vedeva 'a campagna
spasa nfì ê fuosse
'e nu munno ca se lagna
addò se parla na parlata doce
musso musso maje 'ncanna e cresènza nun só
pe' ll'uocchie 'e figlie... Adda fernì
'o suonno...
chiàntano ciéuze e chesta è 'a casa mia
cu llibbre uno 'ntrìdece sul'isso
('o masto d''e penziére?)
e fuoglie ammuntunate 'a sotto 'a coppa, 'e suore...
mo' nce tràfechia attuorno na mascella, è chesta 'a casa mia
(friddo fòra, n'acquazzìna 'nfame)
e nce saglie ogne ttanto 'a miez'â via
na voce furastèra
ma dellecata comme ll'aria 'int'ê scelle
'e chi pe' malasciorta nun vola...

Po' s'annasconne areto a na lummèra
'a muscella e justo justo se cunfonne,
che sta saglienno, 'a voce 'o libbro 'ntrìdece e 'a campagna
nun se vede 'a campagna ca se vedeva... Adda fernì
'o suonno...