0.
Tati lelfvntripa pichike che kishuke niey tanhi pepilelchi awkantun egvn. Ka kishu asdvmkey chumgechi tanhi asdkvnuael tanhi chummekeael rume egvn. Fey chumgechi tanhi konvmpan tanhi rakisduam mew, fey asdentuniekey nhi chumael rume egvn. Kinheke mvleyey tati sdoy pepiluwlu nhi chummekeael rume, welu ka mvley ti pichike kampu rume kimkvlelu. Ka femgechi mvley ti pichike kampu wesdwesdkvlelu. Fey tvfa tanhi femgen kinhekentu tati lelfvntripa pichike che. 
1. Chencho
Kinhe rupa Chencho werkvrkeeyew tanhi nhuke yemeael ta mamvlh ti iratuwe mew tanhi kvtraltuael. Feymew Chencho amulu, panvmey sdoy aldvkechi iran, fey epe konkvleputulu wvlginh ruka mew, mvtde lemweturkelay nhi mamvlh. Welu nhi nhuke re lelinierkeeyew mvtden. 
Feymew Chencho epeke neykvm-naqvmvrkey nhi mamvlh. Fey pefilu tanhi nhuke nhi re lelinieetew mvtden, fey pirkefi: `Re lelinieen mvtden, mvna fanetulen. Kelhulaen rume eymi? Eymi am ta re asdkvlerkealu ta ruka mew? 
Chencho kishu tanhi femgechi asdkvnun nhi fey piafiel nhi nhuke. 
2. Kiti
Kiti fewla nhi kamanhmeael ufisha. Rume kvpa kamanhkerkefuy, feymew nhi nhuke yeeyew nhi ufisha egvn furitu wigkul, ka fey pikvnugey tanhi katrvtuyawvlael tvgnole. Feymew Kiti anvlepurkey mvtden, fey nhi pu ufisha lvnkaw mew konpuy, fey wvla witra pvray katrvtumealu. Welu kishu rakisduamvrkey tanhi wesdawiyen nhi pu ufisha, fey yetufi malal mew. 
`Kiti, chumgelu anta pvrvm kvpaltuymi tami pu ufisha?' fey pirkeeyew nhi nhuke. `Tvgwelay! Feymew kvpaltufinh' pirkey ta Kiti. 
Feymew Kiti ka elgemeturkey fey pvle, welu ti pu ufisha rvf tvgwerkelay egvn, fey ka mvchay mvtden ka kvpalturkey nhi kechan ufisha. Feymew ilhkvtugerkey Kiti, welu piweturkelay kamanhmetualu nhi kechan ufisha. Fey lukunaqkvnuwi ka gvmay. 
3. Peyukin
Peyukin yegekerkey tati gilhatuwe ruka mew. Feymew Peyukin pepurkey ti pichike che nhi petu umawnaqvn. Feymew ka amualu ti trawvn mew, sdewmarkey kinhe yugum pichi rvgi, fey elhka yerkey. 
Fey ti trawvn mew wichulgekerkey ti pichike che. Feymew Peyukin walhme asdkintukvnumekerkey, fey ti umawkvlelu shipokvnumekerkefi. Feymew kinheke ti pichike che gvmay egvn, welu kimgelay nhi chumgelugen. Fey ka pichi aldvn mew, fey pegelu, vtrvfnaqvmkvnufemturkey tanhi pichi rvgi. 
Peyukin rume chewvl pichi-wentru-vrke. 
4. Teyu egu Lalin
Fey tvfa egu kamanhkey shanhwe. Sdewma aldvtripa amuleyvm nhi ruka mew egu ka kimuwiyvm tanhi pegenoael trokiwvn egu, fey kawelhutukerkey nhi sdoy aldvkechi shanhwe. Ka kinhe wvlhfanh rvgi mew wimaniekey nhi shanhwe egu tati pvrakawelhunieel. 
Fey pigekefuy tanhi femnoael egu, welu elhka kawelhutukey mvtden tanhi shanhwe egu. Ka kinheke mew kawelhutufi ti sdoy pichike shanhwe. Fey trankey ka wirwirkey egvn. Feymew rume weshakenhmawkvley tati pichike shanhwe. 
Femgechi ta rume wesdwesdkawkey ti epu pichike wentru. 
5. Chamu
Chamu kamanhkey tati pu kulhinh lelfvn pvle. Fey chew rume ta kamanhmeyvm, fey ti mew folitatulepukey kakelu pichike wentru egvn. Feymew kinhe rupa pichi sduamkvlelay rume nhi noytuael tanhi pu kulhinh. Kishu folitatukonkvley mvtden. 
Fey tanhi pu kulhinh wenhetulniey kachilha mew. Chamu tanhi chaw fey yafentumefi ti pu kulhinh. Fey pegepulu, kishu ramtugey: `Chamu, chew anta mvley tami pu kulhinh?' `Tiye mew mvley' pi kishu, fey nhi penofiel rume. 
Feymew nalgey Chamu tanhi sduamkvlenon nhi noytuael nhi pu kulhinh. 
6. Kati
Tvfachi pichi maldend rume kelhukey tanhi nhuke, feymew pepilniey chumgechi tanhi sdewmageken ta korv ka kofke. Welu nhi nhuke rume kunhiwtukukeeyew kvtral mew ka are ko mew. 
Feymew kinhe rupa amulu waria mew tanhi nhuke, kishu sdewmay korv, welu re pichiken tukulelfi iwinh ka chasdi. Feymew mvtde kvme gochasdvlay ti korv, nhi kvme kimnon tanhi korvael. 
Feymew akutulu nhi nhuke, Kati fey pi, `Nhuke, inhche dewmanien ta korv. Eluafeyu kay?' pirkey. Feymew fey pigelu, ti sdomo ayerkey. Fey sdew ilu egu, rume shakirkeeyew nhi nhuke. 
7. Tonho
Tonho petu pichi-wentru-gey wvla, fey asdvmkay nhi sdewmayael kinhe pelota. Trapvmi re weshake panhu, fey sdew iwvsdkafilu, fey wvla trarikafi re fvw mew, tanhi awkantuael kakelu chaf pichike wendvy egvn. Fey wigkul pvle amuy tanhi trawvlael nhi pu pichike wendvy. 
Feymew trawvlu egvn, epu trokinh kontuwi nhi awkantuael egvn, femgechi tanhi chaftu pelotatuam egvn. Kayukeley kake kinhekenhpvle. Fey Tonho kishuke tukulelfi nhi vy tanhi pu igkagealu. Fey tvfa tati pu vytun igka: 1 Alka, 2 Pilpil, 3 Kvmpa, 4 Lhocho, 5 Pitin. 
Tonho asdentunierkefuy chumgechi tanhi pelotatuken tati pu wecheke wentru, welu chew tanhi amumum tati pelota kom wiluinayawi egvn, ka chuchi pvle rume amuley nhi magkvn nhi pelota egvn. 
Fey tvfa tanhi femgechi pepilvn nhi awkantuael ta Tonho. 
8. Richi
Richi we konvrkey wvla kolekyo mew. Fey ti lhitukan antdv nhi amuael, inagechi puwvrkey ti kolekyo mew. Nvlafempufi ti wvlginh kolekyo ka konfempuy, welu chalipurkelay rume. 
Feymew ti kimeltufe fvtapvra lelinieeyew ka mvtrvmeyew, fey ramtugey nhi iney pigen. `Kimlan' pirkey nhi lhowsdugun. `Kimlaymi tami vy? pirkeeyew ti kimeltufe fvtapvra. `Kimlan, welu tanhi chaw ka tanhi nhuke egu kimniey tanhi iney pigen ta inhche' pirkey Richi. Feymew ayerkey ti kimeltufe fvtapvra. Fey ti pichike che ka ayerkey egvn. 
Feymew sdoy ramtugeweturkelay chem rume. Fey ti kimeltufe fvtapvra kimniey ti we konlu kolekyo mew nhi kim lhowsdugukenon. 
9. Tulin
Tulin tanhi epu fvtakeche witranmarkey egu, fey rume poyegerkey ti witran. Kagkalelgerkey ilo, fey kinhe mesha mew poyegey ka matetulgey. 
Feymew Tulin akuturkey ragiantdv kamanhpelu kulhinh. Fey konpatulu ruka mew, chalipafi ti witran, welu ka pvrvm gilhaturkefi ilo tanhi nhuke. Welu kishu tanhi nhuke fey pirkeeyew: `Witran mvtden ta sdewmalpefinh.' Welu Tulin sdoy chem piweturkelay rume, fey nentufemvnhmarkefi nhi ilo ti witran, fey ifemvrkefi ti kagkag ilo. 
Tulin rume wesdwesd pichi-wentru-gey, feymew yamlay tanhi femael. 
10. Tila
Tvfa ta Tila kinhe pichi maldend, rume kvme piwkegelu. Fey kinhe rupa pepurkeeyew nhi kishulen kinhe karukatu sdomo. Tila tanhi nhuke gerkelay, triparkey wariatulu feychi antdv. Feymew ti sdomo, kimlu tanhi kishulen ta Tila, gilhaturkefi pichin rvgo. Feymew Tila elurkeeyew pichi sdoy aldvn tanhi gilhatufel ta kishu. Fey ti sdomo lhowlu mvtden, ka pvrvm chaliturkeeyew. 
Akutulu nhi nhuke ta Tila, feymew fey pirkefi: `Nhuke, akupefuy kinhe witran, karukatu sdomo, welu wvlpelan chem no rume' pirkey kishu. Welu kishu koyldatuy. Feymew kagenturkeeyew tanhi nhuke. `Tila, koyldatulaymi may!' pigey. `Kvmelay ta koyldagen' 
Feymew Tila wesha sduamnaqi fey pietew nhi nhuke. Fey pigelu, norsduguy, fey fey pi tanhi wvlpen kinhe pichin rvgo. Tila rume chemchigey ka rume kim pichi-maldend-gey.