Kinhe sdvgu pian: 
Sdew fvchan inhche, sdoy pura mari tripantu nielu trokiuwvn. Fey tvfachi fentren nhi mogemum kimyepafin nhi chumgekefel kuyfike che yem, kom nhi kakeume asdmogefel kimnieken; kvmeke asd gefuy egvn, weshake asd ka gefuy egvn. Itrokom tvfa nvtramafin fewla: konvmpayafin chumgechi nhi tremmum inhche ka chumgechi nhi mogefum fvchake ldaku em. 
Fewla kalewetuy mogen; tvfachi weche mvtewe wigkatuy egvn; alhwe goymarpuy egvn tainh kvpal nhi gvlam ka nhi sdvgu; kalhi rupape kinhe mufv tripantu, fey mew epe kimwerpulayay nhi mapu sdvgun egvn. Fey mew, sdvgulpe tvfachi lifro$ egvn kinheke naq rume! 
Piken may ta tvfa. 
1
1:1
Kuyfi kakeumekefuy nhi niewvn pu mapuche: kinheke mu gilhanentukefuy vlhcha, kagen mew mvntukefuy fvtdagelu sdomo, kagen mew gapitukefuy nhi fvtapvra egvn 
Feychi kuregeken newen mew sdoy mvlekefuy; fewla nvtramyeafin gapinh sdvgu. 
1:2
Kinhe wentru kuregealu gvlvmkey nhi pu karukatu, igkatukefi. `Kinhe sdomo ayvn' pikey, `kelhumuan, wvle gapitukvnomumean feychi vlhcha.' 
Fey mew trawvtuy egvn wvndman mew. Puulu naqvn antv amukey egvn re ndamundtu pichi mapulele nhi ruka feychi vlhcha, welu kawelhutu aldv mapulele. 
1:3
Feychi kuregealu sdulhikefi epu wentru sdoy newengelu; fey pifi egvn: `Eymi', pifi kinhe wentru, `sdewma konpuliinh ruka mew, witralu gvtantu mew mvlechi gend-nhawe, tuafimi nhi pepi-negvm-unoam; femgenole kewayafeinh mew.' `Ka eymi', pifi ka konda, `tuafimi feychi sdomo, gend-pvnhenh, ka femnieafimi; femnofiliinh wesdwesdkechi kewayafeinh mew, tuafuy nhi panhilwe-kagkawe ka kvme chvgartvkuyeafeinh mew.' Mvlele ka wentru ruka mew, fey igkakelay; welu mvlele gend-lamgen, fey kelhukey; fey ka tugekey.' 
1:4
Fey mew konkey egvn pundumaqkvlechi che mew, lhoftunkechi konkey egvn. Kinheke yekey ilo egvn nhi lhakolgeam feychi trewa. Feychi epu wentru sdoy newengelu witralepuy ina kawitu feychi kurewen che mew, nepele ka witrale mvchay mvten leftuafilu. Feychi kakelu nentumekefi ti vlhcha gvtantu mew. `Ini kam?' pi, sdvgule matuke tugey. `Awem!' pi ti vlhcha, `cherke tvfa, petu nentugepan' pi, wirarvy. 
1:5
Nepey epu kurewen, witray egu. `Chem wesdanhma miawi?' pi, `mvchaykelhepe' pi. 
Feychi epu wentru sdvgulay egu. `Kalhi kvme chamalhtupe', pikey egu piwke mew. Kuyfi triltragkvlefulu egvn kam umaqtupelu. Rupan chamalhtulu, `Chew mvley?' pi gend-nhawe. Fey mew nvfemeyew kinhe konda, kvme kvfiniegey; feychi gend-pvnhenh ka femniegey. 
1:6
Fey mew ilhkukey feychi kurewen, lukatukey gend-pvnhenh ka rumenka pikefi: `Ini kam eymi, chumeyu kam femnieen? Ldeldvmen wesdanhma!' Ldeldvmlayew feychi epu konda. 
Petu nhi nvnieel tvfachi kurewen, feychi kakelu pu konda kuregealu egvn nentumefi egvn newen mew feychi vlhcha gvtantu mew kusdulelu. Kvme kvpamtufi egvn. Fey mew yegey. Re gvman mew amuy. 
1:7
Feychi gend-pvnhenh rume ilhkulu: `Awvmulhan' pi, `weshake trewa yenhmamupan nhi pvnhenh; kuregekeleachi chemchi wesha trewa lefentupvnhenhpaenew? chumgelu kam kvmekechi gilhatupalay?' pi. 
Feychi epu wentru pilay chem no rume; kimfilu egu nhi aldvpu yegen feychi gapinh vlhcha, ldeldvmkvnoyefi feychi epu kurewen, leftripakey ruka mew egu, re lefvn mew peputuy nhi pu kompanh egu. Akutulu kom wirarvy egvn; `yapimvn' piwi egvn, kefvfay egvn ka sdvguli nhi pifvlka egvn. 
1:8
Feychi vlhcha witranyegey epu kuq mew; ayvnolu nhi amual fey newen mew witranyegekey, welu kewagekelay. 
Aldvmapu tuuchi gapitualu ndamundtu amulay egvn, kawelhutuamukey egvn. Fey mew nentumeel feychi gapitupeel aldvtripa ruka mew, wvne pvraley kawelh mew feychi kuregealu wentru; fey mew pvramelgey nhi nieachi vlhcha, wentelhi kawelh mew elgey, magkasdi gendgealu kure; trarvntvkulelgey lhawe mew, kvntaley egu. Femgechi yegey ti vlhcha. Kom amuletuy kinhewvn egvn, amukefvfay egvn ka re pifvlkantun mew amuletuy egvn, wirarvkey egvn. 
1:9
Fey mew sdoy lhasdkvy feychi gapinh. `Petu ayetuenew tvfachi wesdakenhma' pi nhi ilhkun. Fey mew vgartvkufi furi mew nhi magkasdnietewchi wentru fvtayeafilu. 
Ka wirarvy egvn, ka vgartvkufi furi mew, keltvfentunhmafi furi mew nhi trawa nhi fvtayeaelchi wentru; kake wirarvn mew ka kake kefvfan mew, ka femgechi vgartvkumekekey. Fey mew `fente ayekamvn, sdoy kefvfawekilmvn!' pi magkasdnielu, `mvtewe vnatuenew, afi nhi furi nhi vnatunhmaetew.' Fey mew re nhochi amuletuy egvn. 
Femgechi puy nhi ruka mew egvn. Fey pi feychi kuregealu: `Sdewma fvrenemum, wvle ka kvpayaymvn' pifi nhi pu konda kelhuuma gapitun mew. Fey wvsday egvn. 
Feychi kuregealu yey nhi vlhcha lelfvn mew nvntuafilu; fey mew umaqpuy egu. Ka antv akutuy egu ruka mew. 
2
2:1
Fey tvfachi antv ka trawtuy feychi gapituuma ilotualu. `Yegeniepe ufisha ial nhi pu konda' pi we kuregelu. Yegemey, malaltvkugepay. Fey mew fey pi kay: `Nvlmuchi tiechi fvcha karniru$.' Fey nvgey vnvmtuael. `Trafogepe chasdi' pikey kay, `apolhgepe, apolhtuainh may.' 
2:2
Petu ldachi ufisha feychi gapinh anvmkvnogey ina kvtral. Kinhe sdomo nvtramkanieyew, pilheltuniegey; fey pigey: `Mvtewe lhasdkvlayaymi; filh inh sdomogen femgechi niegekeinh, repentelgey$ che, lhasdkvkerkey, femgechi femimi ta tvfa, welu mvtewe rume lhasdkvlayaymi, kvme gvnaytugeaymi; fvrenegerken che niegekey, kvsdawmayael, chem no rume afnoalu. `Kutran yemugepe nhi kure' pinoalu wentru nielvmkey. Ka antv rupale mi lhasdkvn sdvguyegetuaymi `mvnda malmagetulay' pigetuaymi; `che pi, chewetulay, mvndakvnowtulay fvtagelu' pigetuaymi ta tvfa, mupinh mu shume, fey pigeaymi. Fey mew chumal mvtewe lhasdkvafuymi?' pieyew ti sdomo, gvlamkaeyew. 
2:3
Ka fey pieyew: `Kinheke gapinh ka femgechi gvlamgekefuy, konkelay nhi gvlam, tutripatukey (ka tripatukey). Fey kvmelkalay femlu, wesha gapinh gekey, kvme pvlhv gelay, eymi femlayaymi. Femfulmi, wesha che geafuymi; sdvguyewtvkuafuymi tami chaw ka tami nhuke. Feyegu ka pegele nhi gilhansdvgugeal egu; fey rupakayay nhi lhasdkvn ta tvfey egu; ini no rume ldayelay nhi lhasdkvn.' 
2:4
Petu nhi gvlamel fey pipufi nhi pu konda feychi kuregelu: `Fachi antv may vnvmtuwain inh kelhumofiyvm, sdewma may kulpaluwvn$ tvfachi sdomo mew. Kalhi pichi rupale nhi lhasdkvn gend-nhawe egu gend-pvnhenh, fey konay nhi kimelsdvgu, mvchay pili lhowmagelay nhi dsvgu', pi we kuregelu. 
Feychi ilo-ufisha afvy, malhugey. Wvne katrvgey patia$ mew feychi apolh; wvsdalelgey kom gapitukvnowma keyv pu sdomo; feychi gapinh ka elugey. `Eymi elumefige' pigey kinhe wentru, `ka pichi eluafimi gvlam, tvfachi rali apolh mew mishapuafimi', pi gend-kure. 
2:5
Fey mew feychi wentru yey nhi rali apolh, anvpuy feychi ina vlhcha-sdomo; fey pipufi afkasdipulu: `Femi may, papay, iaiyu may tvfachi apolh ufisha; mvte may lhasdkvlayaymi mvnhal fvcha mapu amulaymi, lhekv mvlekay tami nhuke, mvlele mvn kvmelkawvn, filhantv reke peniewkayaymvn. Filh che kuregekerkey ka filh sdomo fvtagekerkey: asd inh femkvpalgerken kuyfi mogen mew fvchake che yem.' Fey mew `Chumgelu nhi femgen inhche?' pilayaymi, lhasdkvlayaymi; gvnaytugen reke yegemeymi; ka inhchinh amuinh, welu wesha femuulainh, kvme kvpaluwinh; fey mew kam rume lhasdkvpeafuymi, naqay mi piwke; traf mapuche inhchinh, rupayay mi lhasdkvn. Fey mew `kvme sdvgufichi' pieyu tvfey, papay; iyu may tvfa, lhowelen tvfachi katrvn apolh, mvnhal sdvgu no tvfa', pifi gapinh. 
2:6
Elufi man kuq mew feychi katrvn apolh: `Tvfa may' pifi. Lhowi feychi we kure, i egu chaq. Fey wvla witray tvfachi wentru. 
Ka feychi malhun ilo nentugey chalha mew, apolgey kinhe patia$; fey elugey kinhe wentru, nhisdolkvnogey feychi patia$ malhun ilo mew. Fey wvsdami kom nhi pu kompanh mew gapitukvnowma, kom vnvmtuy egvn keyv sdomo. Aflu nhi ilotun egvn ka pvtokoy egvn mushay keyv mvrke. 
Rupan kom pvtokolu egvn `amutuainh' pi egvn. `Amuaymvn may!' pi feychi kuregechi wentru; `konale inh gilhan-sdvgun, fey mew ka kimaymvn', pi nhi karukatu. `Feley' pikey egvn; fey wvsday egvn. 
3
3:1
Feychi gapinh mvlekay gend-kure nhi ruka mew, petu lhasdkvlewey. Feychi kake sdomo gvneltueyew nhi pepi amutunoam; ka kvmelkanieyew nhi wimam. Femgechi lhakosduamuwi. 
Rupale kinhe kvla antv koni kimelsdvgu nhi kimam gend-nhawe egu gend-pvnhenh chew nhi mvlepun nhi pvnhenh. 
3:2
Welu kom gapinh konkelay nhi gvlamgen. Feychi vnhamgelu mvgel konkelay; niekakey nhi ka sduam. Re gvnen mew wimuufaluukey. Rupay epu, kvla antv, `sdewma wimpay inh gapinh' pikey gend-ruka nhi pu sdomo. Fey mew newe gvneltuniewekelay. Feychi sdomo kimfilu nhi fvltugewenon, mvchay mvten nhamrumey. Sdewma aldvpu amuy, fey mew fey pikey gend-ruka sdomo: `Chew rumepey gapinh ka ma, chumgen amupetulayafuy? Wekun gvneltupe, miawkafuychi.' Fey mew gvneltugekey, pegewelay. `Amutukey' pigey. 
3:3
`Chumafun?' pi nhi fvta, `ka chumael gapitupeafuin, kinhe ina gilhanentukayafin kvmekechi, trvrvman kulhinh, sdewma kom pepikauli, mafvmean; mafvli elutuaenew nhi sdomo gend-nhawe; pilayay rume, mvley nhi inapatuaetew.' 
Femgechi femi, ka nvtuy nhi kure. Feychi gend-nhawe wvltuy nhi nhawe nhi mafvgen mew; wvltunofule malogeafuy, ka feychi sdvgu nhi lhvkafiel mew wvltuy. 
3:4
Wimnolu ka lefkatukey kinheke mu. Welu puwekelay nhi chaw mew lhvkafilu; puutufule, newen mew yetukeeyew nhi fvta mew. Fey mew lhumkey mawisda mew, chew fvlkvlele nhi kinhe mogeyeel. Fey mew lelfvn mew miawlu kinhe sdomo, pewfaluukefi, `faw mvlen' pikefi, `fvrenemoan pichin ial' pifi feychi sdomo. Yelgekey lhumkechi, welu lhumkechi ka amulelgekey sdvgu gend-kure. `Faw mvlepay mi sdomo' pigekey werken mew. Fey kimi gend-kure, kintupatukey nhi kure, yepatukey. Nieputufilu ruka mew, elelkefi kinhe sdomo kuysdayalu$, wimi wvla fentekuysdagekey$. 
3:5
Kinheke mu, wimnolu feychi gapinh, yekeeyew nhi fvta aldvmapu, nome lewfv, nhi pepi lefnoam. Niegemekey epu kvyen, kvla kvyen, wimi wvla kvpalgetukey ruka mew. 
Feychi gapinh pepi chumwelay, mvley nhi inayael mvten nhi fvta. Kanhpvle amufule lhowgelayafuy. `Chumgelu akuymi faw? Eymi fvtageymi ka mafvnhmageymi, fey mew lhowfallayaymi; inhche faw lhoweliyu weringeafun ka malogeafun, femafenew mi fvta', pi feychi wentru chew nhi pumufum. 
Vnhamgelhefule rume petu nhi gapitugenon, mvley nhi eltual nhi vnham, nhi fvta mvten mvley nhi inayafiel. 
3:6
Kinheke sdomo rume maykelay nhi nieatew, feychi wentru nhi gapituyawvletew. Kinhe ina reyeeyew nhi chaw nhi wvlatew feychi wesha wentru mew, `sdoy kvmepey nhi ldagvmuwal' piuwi. Fey mew kinheke mu pvltrvkenowkvy lhasdkvlu, welu kinheke mu mvten. 

Epe ldayalu fey pi-ukeinh kom mapuchegen: Fewla rupay kom kimnoke sdvgu fvchake che yem, fewla petu kimniefiinh Gvnechen nhi kimelcheken: mvley inh feyentuafiel Gvnechen nhi sdvgu ka inh inayafiel Gvnechen nhi piel; fey mew, ldayelu inhchinh rupan kvme mogeyelu, sdoy kvmelkaletuainh, femgen nvrpuainh tainh afnoachi manhumtu Gvnechen nhi mapu mew. 
Piken may ta tvfa.