Tommaso Grossi



***********************



LA PRINEIDE (SOGN)


Judicatum est de singulis secundum opera ipsorum
Apocalisse (Cap. XX)


L'era ona nocc di pù indiavolaa,
Scur comè in bocca al lôff: no se sentiva
Ona pedanna, on moviment, on fiaa
Ch'el dass indizi de persona viva:
Domà che on can de malarbetta sort
El faceva el versari de la mort;

E mì che tapasciava in vers Milan
Su la strada Comasna soll solett,
Slongava el pass, chè a parlà ciar quell can
El m'aveva mettuu on poo de spaghett:
Se sent a sonà i ôr a on orolocc ...
Scolti! ... l'è giust in pont la mezza nocc!