G. Gandini

poesie


*****************



CARPE DIEM


Quanti vòlt
te vorarisset
che fudess anmò
...ier
per ona carezza 
mai dada,
per on moment
de tenerezza
che te see faa scappà
perchè te gh'hee
semper pressa.

Quanti volt
te vorarisset
che doman
fudess anmò
...incoeu,
per desmètt
de lavorà
domà mezz'ora prima
e acòrges
che in mezz a i nivol
volen i rondin.



EL PITTOR


L'era là, in sul canton
con davanti i sò color
con la faccia de vun bon
ch'el pitturava cont amor.

El pitturava ona piazzetta
cont in mezz on bel giardin
e settada sù ona banchetta
ona mama e 'l piscinin.

Ògni tant on quaj curios
el faseva 'na domanda
quasi quasi on poo borios:

"Ma l'è drizza quella pianta?"
senza dagh mai tròpp a trà
l'è andaa avanti on poo de dì
fin a quand tutt sodisfaa
el sò quader l'ha finii.

L'è staa in quella che lì visin
salta foeura de 'l perruchee
'na sciora cont el cappellin
de quij che gh'hann tanti danee.

"ma che bell quell quader lì
con quij piant e che color,
ch'el me disa, l'ha finii?

Mì gh'el compri de sicur!"

El mè quader l'è finii,
e anca se me piang el coeur
el foo sugà per duu o trii dì
e poeu gh'el vendi se la voeur"

"El gh'ha nò de vess tròpp car,
che da quand l'ha cominciaa
hinn passaa pòcch dì, me par!"

El pittor on poo rabbiaa
l'ha risponduu in 'sta manera:

"Mi gh'hoo nò miss on quaj dì,
ma gh'hoo miss la vitta intera
per vess bon de fall inscì!"



INSEMMA A TÌ


Confus,
sbiavàa
gh'hann tanti ann.

Sconduu
in fond
a on cassett,
desmentegaa...
pien de nostalgia.

Divers da ier
te paren adess...
adess,
doman
t'en guardet on quaj vun.

Hinn de rid,
de piang,
ma hinn tutti
bej
i ricord.



L'ALTRA VITTA


L'è quella che te sognet
ona volta ogni tant.

L'è quella doe te tratten
quasi semper cont i guant.

Là te capita de vess
propi tì el pussee fort
e te see daa de fà
per mett a post i tort.

E poeu te see riussii
a vess on grand attor
o forsi on grand atleta
o 'n eroe senza timor.

Ma dopo poeu succed
che in sul pussee bell
te ven de ragionà
e 'l borla-giò el castell.

E tì te ricomincet
la vitta giornaliera:
desmentega quell'altra
che l'è ona "chimera"



SAVIEZZA


Qual la sarà mai?

Quella de tasè 
quand tasen tucc
o quella de parlà
quand i alter tasen?

Quella de dì i veritàa
inscì come hinn
o quella de scondii
magara per pietaa?

Ma, forsi quella vera.

L'è quella de vegh
i dubi prima de parlà
e trovà la strada giusta dòpo.




da: SCIROEU de MILAN