L'apparenza inganna


Eren vegnuu sù cónt ona faccia de funeral e se seren settaa dedree senza fà paròla.
Spettavi l'imbeccada per partì e, quand hoo vist che la vegneva nò, hoo dimandaa: "Inpiasé, sciori, me voeuren dì dóve se va?"
"In gir per la città", l'è stada la risposta.
"In centro o in periferia?"
"Dove el voeur lù."
Son partii, ma la faccenda l'era strana: pareven inlócchii, soturni, stralunaa... fussen drogaa. ? Mì guzzavi i orecc per scóprì per qual misteriosa resón qui duu lì aveven ciappaa el tassi... Ma lór parlaven nò.
Dopo on bell des minutt de viagg vun el s'è decis a dervì la bócca: "Cinqucentmila franch. - l'ha barbóttaa - Che stangada!" E giò on sóspir che pocch ghe calava a trà sù l'anima.
"Cinqucentmila! - gh'ha faa eco quell'alter - Mezz milión! E pensà come l'era combinada ben la gàbola!"
"E adess chi paga?"
"Paga chi ha sbagliaa."
"Cosa te vorarisset dì?"
"Che tócca a tì de pagà perché te see tì che t'hee sbagliaa. Cosa t'è saltaa in ment de rilancià senza avegh gioeugh in man?"
"Hoo rilanciaa perché tì t'hee pizzaa la svàpora che l'era el segnal, come d'accòrd, che te gh'avevet in man el pocker o la scala real."
"Bestia! La svàpora l'era el segnal de fà "parole" e passà via."
" Oh, che gamber! E adess come se fà? I debit de gioeugh vann rangiaa denter i ventiquattr'or, e el Rico l'è vun che scherza nò. El viaggia sémper cont el rebattín sott sèlla e el ghe pensa minga dò vòlt a inciodamm."
"0 poveri nûn! Hoo appena pertegaa el Longines e semm chì in bolletta sparada."
A sentì sti discórs m'è vegnuu la pell d'oca. Hoo pensa: "Sti duu chì me fann girà per Milan ancamò on'ora e gh'hann nanca pù on ghell in saccòccia. Se gh'hèmm de falla foeura l'è mej falla foeura subit." Hoo férmaa la macchina e hoo dimandaa: "Sciori, basta inscì?"
E lor: "Nò, nò... ch'el vaga innanz fin che gh'el dísom nûn." Ciósca! Pussee se va innanz e pussee va sù el tassametro e anca el ris'c de andà in bianch. Luisin, besogna trovà la via de vegninn foeura.
Trovada: me fermi in d'on cantón dove gh'è on "ghisa" e foo mostra de vess restaa senza benzina. A la pesg, se ghe sarà de discut ciamaroo l'omm de la legg.
A sentì sta notizia i passegger resten lì e me dann del cojon perché, disen lôr, on tassista prima de ciappà servizi el dev fà el pién per ogni evenienza. E mì a respond che el client el dev dà on indirizz precis e minga fà girà il tassi inscì a la fiora.
Se discutt e, a la fin, mì proponi de ciamà arbiter el "ghisa" perché son sicur che lor gh'hann minga i danee per pagà la córsa. Invece lor disen de lassà pèrd, tiren foeura on quajott pien ras, pàghen e vann via.
Tanti volt l'apparenza inganna!