Kev Khwv Nyob Nplogteb 
Tus sau: Teeb Muas 
Peb nyob rau teb chaws Nplog mas peb kuj muaj ntau yam los mus ua. Xws li ntawm cov uas peb ua ntawd yog ua teb, tu tsiaj los ua lag luam, thiab kuj muaj kev kawm ntawv tib si. Yog tias peb nyob rau teb chaws Nplog, peb tsis ua tej ntawd ces peb tsis muaj dab tsi los mus noj. Vim yog li, peb thiaj li yuav tsum los mus ua tej ntawd mas thiaj li yuav koob peb.
Cov laus thaum ub mas lawv nyiam cog nplej, cog pob kws, thiab cog yeeb rau saum tej roob heev li. Yog tias yus tsis mus ua tej ntawv ces yeej tsis muaj mov los mus noj li. Lawv thiaj li mus cog tej ntawv kom tau me ntsis los mus noj. Cov laus nyob rau Nplogteb, yog tias yus tsis mus khwv tiag ces tuag tshaib xwb. Mas ib yim twg mas lawv yuav tsum ua li ob dlaim teb nplej thiab teb pob kws. Txog caij muab sau tag mas nyuam qhuav txaus noj ib tog xyoo xwb. 
Thaum ub cov laus lawv yeej tsis pub ib lub mov los yog kom muaj ib qhov qub mov pov tseg li. Vim tias lawv tsis muaj mov ntau los mus noj mas lawv thiaj li khuv xim heev. Cov laus thaum ub mas tsis zoo li tiam tam sim no lawm. Yog tias yus tsis khwv ces yus yeej tsis muaj leej twg muab rau yus noj li. Yog li cov laus thaum ub thiaj rau siab mus khwv heev.
Peb cov Hmoob, lawv mus tu nyuj, twm, qaib, nua, thiab aub. Cov tsiaj no lawv tso sib nraus thaum txog peb caug. Thaum muaj kwv tij neej tsa tuaj xyuas, lawv mus txhom npua thiab qaib coj los tua rau cov kwv tij neej tsa noj. Nyuj ces pub kom rog rog tos txog peb caug es tso sib nraus xwb. Lawv cab mus tso sib nraus rau sawv daws saib. Twm ces cov laus tos txog lub caij ntuj nag los ces lawv coj mus laij liag thiab tu los tua coj mus muag rau txua qhov txhia chaw xwb. Cov laus mas lawv tu aub los mus npaj rau thaum lawv nqi nqi nqaij es lawv yuav mus plob. Lawv yuav tsum siv aub coj mus caum kauv, los yog npua teb, thiab mos lwj, los yog tsaug tej. Aub mas yog ib yam tsiaj ntse tshaj plaws, nyob rau tib neeg lub neej. Tsis tas li ntawv, aub nws tseem pab zov qaib thiab zov npua huv tib si.
Thaum ub, Hmoob ua luam yeeb thiaj muag tsiaj txhu. Lawv tos txog lub caij tab tom yuav pib mus ua teb, lawv yuav tsum mus rau Nplog tej khw muag ntaub, muag xov. Yus mus yuav phuam, txhuam hniav, khau khiab ntaub xov, kaus mom, thiab txiab txiav paj ntaub tej kom tau ntau ntau li coj mus muag rau cov Hmoob uas nyob deb deb pem tej roob siab. Yog tias lawv tsis muaj nyiaj ntsuab, yus yuav tsum yuav yeeb los yuav nyiaj daim yus tiaj li tau nyiaj. Cov laus tsis paub lus Nplog ces koj mus yuav lawv cov npua pem roob li nees nkaum tawm tus mam li cab ua ke los muag rau cov Nplog uas lawv tua npua muag ntawv. Yus yeej yuav tsum muaj nyiaj los siv rau lub neej tom ntej. 
Hais txog ntawv kev kawm ntawv mas cov me nyuam tub uas nyob raub teb chaws Nplog mas tsis tshua muaj kev kawm puas tsawg. Vim tias lawv khwv heev mas lawv thiaj li tsis mus kawm ntawv. Tsuas yog tus puav uas nyob nram zos loj mas lawv thiaj li mus kawm ntawv xwb.
Hmoob lub neej uas nyob rau teb chaws nplog, lawv tsuas muaj ib co zoo li hais tas li no xwb. Lawv tsuas ua tej no lawv thiaj li tau mov los noj.