Txoj Kev Khwv Nplogteb
Tus Sau: Txam Tsab 
Kuv yuav piav txog peb cov Hmoob uas nyob rau teb chaws Nplog seb sawv daws nyiam ua dab tsi. Nyob lub ntuj qub qab, Hmoob muaj ua liaj ua teb, tu tsiaj txhu, ua lag luam, thiab muaj kev kawm ntawv. Yog tias peb tsi ua tej ntawd ces peb yuav tsum tsis muaj dab tsi ua. Peb cov Hmoob yeej ib txwm nyiam tu tsiaj los yog ua liaj ua teb nyob rau tej qhov chaw siab xwb. Tej ntawd yeej yog Hmoob lub keeb kwm puag thaum ub los lawm.
Cov laus thaum ub mas lawv nyiam cog nplej, cog pob kws, thiab cog yeeb rau saum tej roob heev. Yog tias yus tsis mus ua tej ntawd ces yeej tsis muaj mov los noj. Lawv siv zog los mus ua tej teb ntawd mas thiaj li yuav tau mov los noj xwb. Cov laus nyob rau teb chaws Nplog mas yog tias lawv tsis khwv tiag, lawv yuav tsum tuag tshaib xwb. Ib yim neeg twg yuav tau ua li ob los yog peb daim teb npleg thiab teb pob kws. Thaum txog caij siav, muab sau tag mas nyuam qhuav txaus noj xyoo ntawd xwb. 
Thaum ub mas cov laus lawv twb tsis pub ib lub mov poob qhov twg li thiab twb tsis pub muaj ib qhov qub mov pov tseg li. Vim tias lawv tis muaj mov ntau los mus noj, lawv thiaj li khuv xim heev. Cov neeg thaum ub lawv tsis zoo li tiam tam sim no. Yog tias lawv tsis khwv ces yeej tsis muaj leej twg muab rau lawv noj li. Yog li no, txhua leej txhua tus thiaj li rau siab los siv zog khwv.
Yav thaum, peb cov Hmoob kuj nyiam tu tsiaj txhu. Cov tsiaj uas lawv tu yog nyuj, nees, npua, qaib, twb, thiab aub. Tus nyuj lawv tu los muag. Tej zaum tu los thauj nra xws li thauj pob kws los yog nplej. Txog lub caij peb caug, lawv kuj tso nyuj sib nraus rau pej xeem huab hwm saib thiab. Tus nees mas lawv tu los mus saib, caij, thiab thauj khoom ib yam li tus nyuj. Tus aub mas lawv tu los mus zov tsev ua luag. Muaj ib txhia aub mas yug los caum mos lwj, kauv, sai, npua teb, thiab lwm yam tsiaj qus thaum lawv mus yos hav zoov. Nyob li tus qaib mas lawv tu los mus tua noj thiab siv los mus ua neeb ua yaig. Tus twm mas lawv kuj tu los mus laij liag thiab tej zaum kuj tau tso sib nraus. Tej zaum muaj neeg tuag, Hmoob kuj yuav twm los tua thiab. Tus npua mas lawv tu los tuaj noj thiab coj los ua neeb ua yaig kho poj niam me nyuam.
Nyob Nplogteb, cov laus kuj muaj kev lag luam thiab. Tsis zoo li peb nyob teb chaws no, lawv tu tsiaj los mus muag thiab lawv cog yeeb los mus muag xwb. Cov tsiaj uas lawv tu muag ntawv yog nyuj, twm, thiab npua. Ib tug tsiaj no lawv muag yog li ntawm rau los xya choj nyiaj dawb. Yog tias yus tsis tu tsiaj los mus muag mas yus yuav tsum tsis muaj nyiaj li luag tej. Peb nyob rau teb chaws Nplog mas kuj yog tias tis muaj lag luam ua pes tsawg. Peb tsis muaj kev tsheb thiab tsis muaj zos loj nyob ze ib ncig ntawm cov zos me li. 
Hais txog kev kawm ntawv, cov me nyuam mas tsis tshua muaj kev kawm. Vim tias lawv khwv heev, lawv thiaj li tsis mus kawm ntawv. Tsuas yog tus puav uas nyob nram zos loj mas lawv thiaj li mus kawm ntawv xwb. Yog tias yus tsis siv zog los mus ua teb mas yus yuav tsum tsis tau mov los noj. Thaum ub kev kawm ntawv mas tsis muaj ntau yam kawm. Tsuas muaj ntawv Nplog thiab ntawv Hmoob me me xwb. Vim tias thaum ub tsis muaj cov kws uas txawj los mus qhia rau cov me tub me nyuam; lawv thiaj li tsis muaj ntau yam los kawm. 
Cov kuv tau piav los no peb Hmoob yeej ib txwm ua los kuv thiaj li muab sau tseg rau sawv daws tau nyeem thiab khaws cia ua peb Hmoob tug.