Jasy moroti
Darío Gómez Serrato rembiapokue


Jasy moroti remaña mombyrýva cherehe rehóvo
py’a tarovágui marõ nderekévai cheichaite avei
ha chéicha remuñáva araka’eve jahupyty’yva
ndéko che reindy, jasy moroti, maña asymi.


Ejehykuavóna ko kuñatai rógaguy porãme
jasy moroti ehesapemi ko che rendagua
añesupehêta ko hovetã guýpe a aropurahéita
mba’asypo’ícha che pytéva oikóvo ko mba’epota.


Rekevareína kuñatãimi ahayhu porãva
epáy ehecha nerokême oúva oñepomoi
Tupãmba’ejára nerenói haguéma hembe ruguypáma
ha nde rechaségui yvága ru’ãre hesakã rei.


Ka’aguy poty che moakãnundúva nde pukavymíme
ha nerakuãngue rapykuéri aikóva anga atyryry 
esê che rendápe he’ukamo chéve nde jurúgui eíra
tosopa anga che mbyay’uhéi ka’aguy poty.


Esê che rendápe...Ha nde apysaitépe tamombe’u ndéve
mba’éicha rupípa ko che mitãhápe aiko añembyasy.
Che páy ha che kéra urutau resêicha che py’a jopýva
ha yvytu pirúicha che ruguy apére oikóva opoñy.


Jasy moroti remaña mombyrýva cherehe rehóvo
nderekéi haguéma nde resa’yju cheichaite avei
ko’êramointénte rehasa hasa ha reiko reikóvo
che tavy haguéma reikuaava’erã jasy moroti.