Súanach sin, a Éorann án
Author: [unknown]

Súanach sin, a Éorann án
Suibne and Éorann
As amlaidh éimh ro bhuí Éorann an tan-sin ar f-feis le Gúaire mac Conghaile meic Sgannláin, ar rob í Éorann fa bean do Shuibne [gap: ellipse]. Ro-síacht trá Suibhne go n-ige an baile ina raibhe Éorann. Do-dheachaidh Gúaire do sheilg an lá-sin [gap: ellipse]. Deisidh íarum an gheilt for furdhorus na boithe i raibhe Éorann, conadh ann it-beart: `An cumhain leat, a inghean', ar sé, `an grádh romhór do-rad cách úainn dá chéile an ionbhaidh ro bhámmar imur-áon? & is súanach sádail duitsi', ar sé, `& ní headh dhamh-sa'; conadh ann ad-beart Suibhne & ro fhreagair Éorann é:{speech Suibne}
Súanach sin, a Éorann án,
i leith leptha ret lennán;
ní h-inann is mise i fus:
cían ó a-túsa ar anforus.
Ro ráidis, a Éorann oll,
aithesc álainn imétrom,
co ná beithea it bethaid de,
scarad énlá re Suibne.
In-díu is súaichnid co prap
bec let bríg do sencharat:
te duit ar clúim choilcthe chain;
úar dam-sa i-mmuig co matain.{speech Éorann}
Is mo-chen duit, a geilt glan:
tú is tocha d' feruib talman;
gid súanach, is súaill mo chlí
ón ló at-chúala tú ar nefní.{speech Suibne}
Is tocha let mac in ríg
beires tú d' ól gan imsním;
is é do thohcmarc toga;
ní íarr sib bar senchara.

{speech Éorann}
Ce nom-bered mac in ríg
do thigib óil gan imsním,
ferr lim feis i cúas cháel chroinn
let, a fhir, díanot-cháemsainn.{speech Suibne}
Córa duit serc ocus grád
don fiur 'gá taí th' áenarán
iná di geilt gairb gortaig
úathaig omnaig urnochtaig. {speech Éorann}
Dá tuctha mo roga dam
d' feruib Éirenn is Alban
ferr lem it chommaid gan chol
ar uisce ocus ar birar.{speech Suibne}
Ní conair do degmnaí dil
Suibne sunn ar slicht imnid:
úar mo leptha ac Ard Abla;
nídot terca m' úaradba.{speech Éorann}
Mo-núar, ám, a geilt gnímach,
do beith éitig imsnímach;
sáeth lem do chnes ro chloí dath,
dresa is draigin dot répad.{speech Suibne}
Ní dá chairiugud dam ort,
a máethainder máeth étrocht:
Críst mac Maire, mórda cacht
é dom-rat i n-écomnart.{speech Éorann}
Ropad maith lem ar m-beith ar-áen,
co tísed clúm ar ar táeb,
co sirinn soirche is doirche
let, cach lá is gach énaidche.

{speech Suibne}
Adaig damsa i m-Boirche binn;
ránac Túag Inbir álainn;
co sirius Mag Fáil co fraig;
táirlius do Chill Uí Súanaig.
Ní thairnic dhó acht sin do rádh an úair ro líon an slúagh an longphort as gach aird. Téid-siumh íarumh ina réim romhadhma for teichedh amail ba minic leis.