Gáir na Gairbe glaídbinne
Author: [unknown]

Gáir na Gairbe glaídbinne
The Cry of the Garb
{speech Suibhne}
Gáir na Gairbe glaídbinne
glaídes re tosach tuinne;
rátha aidble aíbinne
d'íasc oc irshnám 'na bruinne!
Gairit lem mo chomainmne,
fégad lán línas múru:
buinne rothrén roGairbe,
uis 'gá chor ar cúlu.

Is súairc immar glecait-sium
tuile is aithbe co n-úaire;
imá-sech do-ecmait-sium
sís is an-ís cech úaire.
Cairche cíuil at-chluinim-se
'sin Gairb go n-glúaire geimrid;
ra muirn móir con-tuilim-se
i n-aidche adúair eigrid.
Éoin chalaid co céolchaire,
céoilbinne a n-gotha gnátha;
impa rom-geib éolchaire,
'má ceilebrad cech trátha.
Binn lem loin oc longaire
ocus éistecht re h-aifrenn;
gairit lem mo chomnaide
ar drumchla (Durthaigh Faithlenn)
Is ríu-sein con-tuilim-se
ar bennaib is ar barrgail;
na céolas do-chluinim-se
is airfeitiud dom anmain:
Céol na salm go salmglaine
i Rinn Ruis Bruic cen búaine;
dordán daim duinn damgaire
do lecain Erce úaire.
Codlad adúar áenaidche;
éistecht re trethan tuinne;
gotha aidble énlaithe
d' fhidbaid Fheda Cuille;
Osnad gaíthe geimreta;
fúaim doininne fa dairbre:
géisid lec úar eigreta
oc maidm tría gáir na Gairbe.

Duilig trátha d' urmaisin
i m-bentar cluic cen bailbe,
ra sían Inbir Dubglaise
oc ra gáir na Gairbe.
Muir na fairrge fograige
timchell síar dorais Airbre ---
gairde lim im chomnaide
éistecht re gáir na Gairbe.
Druim Lethet co l-línmaire
dercain donna ar a dairbre; 
a mac alla is mírbuile
fhrecras lem gáir Gairbe.
Ess Máige, Ess Dubthaige,
Ess Rúaid cos' reithet maigre,
gidat imda a turthaige
binne fogar na Gairbe.
Benn Boirche, Benn Bógaine
is Glenn Bolcán go m-bailbe,
mór n-aidche, mór nónaide
tánac fa gáir na Gairbe.
Tonn Túaige, Tonn Rudraige
(nídat imfhoicse a n-airde):
gairde lim ná a n-urnaide
éistecht re gáir na Gairbe.
Taídiu thenn na tairngire,
binn a h-airdess co n-áine;
in Tacarda ainglide ---
ga h-ess as glaine gáire?
A Mo Ling na connailbe
gus' tucus cenn mo báire,
go n-derna mo chomairge
ar ifrenn as garb gáire!