Robad mellach, a meic mo Dé
Author: [unknown]

Robad mellach, a meic mo Dé
An exile's dream
Colum Cille cecinit:
Robad mellach, a meic mo Dé,
(dingnaib réimenn)
ascnam tar tuinn topur n-dílenn
dochum n-Éirenn;
Go Mag n-Éolairg, sech Beinn Foibne,
tar Loch Febail,
airm i cluinfinn cuibdius cubaid
ac na elaib.
Slúag na faílenn robtis faíltig
rér séol súntach
día rísed Port na Ferg fáiltech
in Derg Drúchtach.
Rom-lín múich i n-ingnais Éirenn
díam-sa coimsech,
'san tír ainéoil conam-tharla
taideóir toirsech.
Trúag in turus do-breth form-sa,
a Rí rúine:
ach! ní ma-ndechad bu-déine
do chath Chúile!
Ba ma-ngénar do mac Dímma
'na chill chredlaig,
airm i g-cluinfinn tíar i n-Durmaig
mían dom menmain;
Fúaim na gaíthe frisin leman
ardon-peite,
golgaire in luin léith co n-aite
iar m-béim eite;
Éistecht co moch i r-Ros Grencha
frisin damraid,
coicetal na cúach don fidbaid
ar brúach samraid.
Ro grádaiges íatha Éirenn
(deilm cen ellach):
feis ac Comgall, cúairt co Caindech,
robad mellach.