A Maire mín, maithingen
Author: [unknown]

A Maire mín, maithingen
Invocation of the Blessed Virgin Mary
Colum Cille cecinit:
A Maire mín, maithingen,
tabair fortacht dún,
a chrïol cuirp choimdeta,
a chomrair na rún.
A rígain na rígraide,
a noíbingen óg,
áil dún coro dílgaithe,
triut, ar tairmthecht tróg.
A thrócar, a dílgedach,
co rath Spirta glain,
guid linn in Ríg fírbrethach
don chlainn chumra chain.
A chráeb do chrunn Iasa
asin chollchaill choím
áil dam condom-biasa
dílgud mo chuil chloín.

A Maire, a minn mórmaisech,
ro sháerais ar síl,
a lésbaire lórmaisech,
a lubgort na ríg,
A lígach, a lainnerda,
co n-gním gensa gil,
a arg óir chaín chainnelda,
a noíbgein do nim.
A máthair na fírinne,
ro chinnis for cách;
guid lemsa do Phrímgeine
dom saerad i m-bráth.
A búadach, a bunata,
a buidnech, a balc,
guid lem Críst cumachta,
t' Athair is do Mac.
A rétla rán rogaide,
a bile fo bláth,
a shutrall trén togaide,
a grian goires cách,
A áraid na ollairbe
trésa cing cach cáid,
corop tú ar conmairche
dochum ríchid ráin!
A chaithir chóem chumraide,
dot-róega in Rí;
oll oíge boí it urbruinne
treimse co ba thrí.
A rígdorus rogaide
tríasar chin i crí
grían taitnemach thogaide,
Ísu Mac Dé bí,
Ar écnairc na Coímgeine
ro coimpred it brú,
ar écnairc in Oíngeine
as Airdrí in cach dú,
Ar écnairc a chroiche-sium
as uaisliu cech croich,
ar écnairc a adnacail
ad-ranacht i cloich,
Ar écnairc a eiséirge
as-raracht ría cách,
ar écnairc a noíbtheglaig
as cach dú do bráth,
Corop tú ar commairche
i flaith Coimded cain,
co n-dechsam la Ísucán
áilim céinbe mair.