Ísucán
Author: [unknown]

Ísucán
Jesus and Saint Íte
Íte [gap: ellipse] co táinic Críst cuicce i r-richt noíden, conid ann as-bert-si:
Ísucán
alar lium im dísiurtán;
cía beith cléirech co lín sét,
is bréc uile acht Ísucán.
Altram alar lium im thig,
ní altram nach dóerathaig ---
Ísu co feraib nime,
frim chride cech n-óenadaig.

Ísucán óc mo bithmaith:
ernaid, ocus ní maithmech.
In Rí con-ic na uili
cen a guidi bid aithrech.
Ísu úasal ainglide,
noco cléirech dergnaide,
alar lium im dísirtán,
Ísu mac na Ebraide.
Maic na ruirech, maic na ríg,
im thír cía do-ísatán,
ní úaidib saílim sochor:
is tochu lium Ísucán.
Canaid cóir, a ingena,
d' fir dliges bar císucán;
atá 'na phurt túasucán
cía beith im ucht Ísucán.