M' óenurán im aireclán
Author: [unknown]

M' óenurán im aireclán
A hermit song
M' óenurán im aireclán
cen duinén im gnáis:
robad inmuin ailethrán
ré n-dul i n-dáil m-báis.
Bothnat deirrit diamair
do dílgud cach cloín;
cubus díriuch diamain
dochum nime noíb.

Nóebad cuirp co sobésaib:
saltrad ferda for,
súilib tláithib todéraib
do dílgud mo thol.
Tola fanna féodaidi,
freitech domnáin ché,
coicle bána béodaidi,
ba sí dígde Dé.
Donála co n-dílechtai
dochum nime nél,
coibsin fíala fíretlai,
frossa díana dér.
Dérgud adúar áigthide
amal tálgud troch,
cotlud gairit gáibthide
díucra meinic moch.
Mo thúara, mo thuinide,
robad inmuin cacht;
ním-dingénad cuilide
mo longud, cen acht.
Arán toimse tírmaide --- 
maith don-airnem gnúis ---
uisce lerga lígmaise
ba sí deog no lúis.
Longud serbda séimide,
menma i l-lebor léir,
lám fri cath, fri céilide,
cubus roithen réid.

Robad inmuin (araidi)
ainim nechta nóeb,
leicne tírmai tanaidi
tonn chrocnaide chóel.
Stanza 11 is relegated to notes by editor; here printed from the notes, pagen 179

Céim íar sétaib soscéla
salmchétal cach thráth,
crích fri rád, fri roscéla,
filliud glúine gnáth.
Críst mac Dé dom thaithigid,
mo Dúilem, mo Rí,
mo menma día aithigid
issind flaith i m-bí.
Ba sí in chrích fom-themadar
eter lissu lann
locán álainn eladglan,
os mé m'óenur ann.
Stanza 14 is relegated to notes by editor; here printed from the notes, page 180

M' óenurán im aireclán,
m' óenurán am-ne;
m' óenur do-llod forsin m-bith;
m' óenur rega de.
Stanza 15 is relegated to Notes by editor; here printed from the notes, page 180

M' óenur ma do-rogbus ní
d' úabar betha cé,
cluinte mo núallán oc caí,
m' óenurán, a Dé.