A Marbán, a díthrubaig
Author: [unknown]

A Marbán, a díthrubaig
King and hermit
{speech Guaire}
A Marbáin, a díthrubaig,
cid ná cotlai for colcaid?
Ba meinciu duit feiss i-m-maig,
cenn do raig for lár ochtgaig.
Seven verses omitted by editor

{speech Marbán}
Atá úarboth dam i caill;
nís-fitir acht mo Fhíada;
uinnius di-síu, coll an-all,
bile rátha, nosn-íada.
Dí ersainn fraích fri fulong
ocus fordorus féthe.
Feraid in chaill immá cress
a mess for mucca méthe.
Mét mo boithe --- bec nád bec,
baile sétae sognath.
Canaid sian m-binn día beinn
ben a l-leinn co londath.
Lengait doim Droma Rolach
assa sruth róeglan.
Fodeirc essi Roigne rúad,
Mucruime múad, Móenmag.
Mennután díamair desruid
día m-bí selb sétrois. 
Día déxin in rega limm?
(Rofinn mo bethu it écmais.)

Mong co (libri)
ibair éoglais:
nósta cél!
Caín in magan:
márglas darach
darsin sén.
Aball ubull
(mára ratha)
m-bruidnech m-bras;
barr dess dornach
collán cnóbec
cróebach n-glas.
Glére thiprat,
essa uisci
(úais do dig) ---
bruinnit ilair;
cáera ibair,
fiadait, fir.
Foilgit impe
mucca cenntai,
cadlaid, uirc,
mucca alltai,
uiss aird, ellti,
bruicnech, bruic,
Buidnech sídech,
slúag tromm tírech,
dál dom thig;
ina erchaill
tecat cremthainn:
álainn sin!

Caíni fleda
tecat (moteg,)
tárgud tricc,
uisce idan
barrán (bitchai,)
bratáin, bricc.
Barrán cáerthainn,
áirni dubai
draigin duinn,
túarai dercna
cáera lomma
(lecna luimm.) 
Líne ugae,
mil, mess, melle,
(Día dod-roíd),
ubla milsi,
mónainn derca,
dercna froích.
Coirm co lubaib,
loc di subaib,
somlas snó,
sílbach sciach
derca iach,
áirni chnó.
Cuach meda
colláin cunnla
co n-dáil daith;
durcháin donna,
dristin monga
mérthain maith.
Mad fri samrad,
suairc snóbrat,
somlas mlas,
curair, orcáin,
foltáin glaise,
glaine glas;
Céola ferán
m-bruinne forglan
forom n-dil;
dordán smálcha
caíne gnáthcha
úas mo thig;
Tellinn, cíarainn,
cerdán cruinne,
crónán séim;
gigrainn, cadain,
gair ré samain,
seinm n-gairb chéir;
Caínciu gestlach,
druí donn desclach,
don chraíb chuill;
cochuill alaid
snaic ar daraig,
aidbli druing.
Tecat caínfinn,
corra, faílinn;
fos-cain cúan;
ní céol ndogra
cerca odra
a fráech rúad.
Rescach samaisc
(a) samrad
(soilsiu sín):
ní serb sáethrach
úas maig máethlach
mellach mín.
Fogur gaíthe
fri fid flescach,
forglas néol;
essa aba;
esnad ala:
álainn céol.

Caíni ailmi
ardom-peitet,
ní íar n-a creic:
do Chríst, cech than,
ní mesa dam
oldás deit.
Cid maith latsu
a n-do-milsiu,
mó cech maín;
buidech liumsa
do-berr damsa
óm Chríst chaín.
Cen úair n-augrai,
cen deilm n-debtha
immut-foich,
buidech dond Flaith
do-beir cech maith
dam im boith.{speech Guaire}
Do-bérsa mo ríge rán
lam chuid comorbsa Calmáin,
a dílse co úair mo báis,
ar beith it gnáis, a Marbáin.