A ben, bennacht fort-ná ráid!
Author: [unknown]

A ben, bennacht fort-ná ráid!
Sell not heaven for sin
At-rubairt Daniél ua Líathaiti, airchinnech Lis Móir, ocá guide don mnaí. Esseom ropo anmchara disi. Baí-si immurgu ocá thothlugud-som. Is and as-bert-som:
A ben, bennacht fort --- ná ráid!
Imráidem dáil m-brátha búain.
A-tá irchra for cach n-dúil:
ad-águr dul i n-úir n-úair.

Im-ráidi baís cen bríg m-baí:
is súaichnid ní gaís fris-ngní.
A n-as-bir-siu bid rád fás:
bid nessa ar m-bás 'síu 'ma-rrí.
A n-airchenn fil ar ar cinn
bad mebor linn (éirim n-gann):
sunn cía na-cráidem in Ríg,
bami aithrig is tír thall.
Ríched ní renaim ar chol;
dam ad-fíther cía do-gnem.
Ní nád faigbe síu íar sin
ní thaibre ar bin, a ben.
Léic úait a n-í (condat-sil);
do chuit i n-nim náchas-ren;
for fóesam n-Dé eirg dot treib
bendacht úaim-se beir, a ben.
Messe tussu, tussu mé,
águr, áigthe Fíadait fó;
guid-siu, gigsea Coimdid cáid:
a ben, ná ráid ní bas mó.
Ná bí for seilg neich nád maith
dáig fot-cheird ind Flaith for cel;
áigthe, águr Críst cen chin
ná ro-lámur tríst, a ben.
`Bid fír ón,' or sisi. Ro slécht-si for a bith-denma-som in eret ro boí i m-bethaid.