A poem on the Kings of Connaught

Author: [unknown]

p.462

Do rígaib Connacht in so sís.

1. A fhir théit i mMag Medba,
do scéla bat scothmebra!
lethaim ós cach túathblai thé
anmann ríg Crúachna caeme.
2. Ocht ríg cóecat, cían roclos,
ó chraitim i n-ardfhlatheos:
ó Amalgaid erccait máil
co Domnall mac Tigernáin.
3. Amalgaid mac Fiachrach Find,
dar a éis rogab Ailill,
íar nAilill Molt cen míne
Dúi Galach i n-ardríge.
4. Eogan Bél d'éis a athar
rogab ria nAilill athach,
Ailill Inbanna ba flaith
íar n-éc Eogain enechmaith.
5. Íar sain rogab Dúi Tenhga
ríge dar éis Ailella,
d'éis Dúach, ba bladach bagda,
Eochu tagach Tirmchárna.
6. Rogab dar éisse Echach
Feradach Find fírbrethach,
dar éis meic Rossa (i)n rubai
Máélcothaid mac Máélhumai.
7. Íar Máélcothaid cáém clethach
Áéd Abrat mac ard-Echach,
íar nÁéd dar grúacu rosglac
Húatu mac Áéda Abrat.
8. Colmán mac Conchobuir caem
íar mac Áéda enechnóém,
íar Colmán rodbí 'sin chath
rosgab in rí Rogallach.
9. Íar mac Húatach, ard a gáir,
rogab Lonhgsech mac Colmáin,
íar Loingsiuch, lúad co n-aidble,
rosgab Gúaire glanAidne.
10. Íar nGúaire ná fáémad fill
rogab Cenn Faelad fírgrinn,
íar mac Colmáin, ba cuiscle,
Dúnchad móénech Muirisce.

-----

p.464

11. Íar nDúnchad grennach co nhgail
Cellach mac réil Ro-gallaich,
dar éiss Cellaich cen chaire
flaith Fergail meic Artgaile.
12. D'éis Fergail figed frossa
Muiredach mac Murgossa,
íarsain, ba sáerda slechtach,
in rí óebda Indrechtach.
13. Rogab Cathal, slógmar sain,
mac maith mórglan Muredaich,
in rígi, dúthaich nár dúail,
íar mac Dúnchaid daigerrúaid.
14. Rogab dar éis a athar
Domnall mac do mórChathal,
íar nhdíth Domnaill cen debaid
Inrechtach mac Muiredaich.
15. Cathal mac Murgiusa móir
íar sin rogab fó chétóir
rí hIrruis Domnann, in daig,
Domnall mac Cathail chétaig.
16. Indrechtach ailithrech án,
mac Muiredaich, mó cach mál,
dara éis, ní dalb decair,
rí Áéd Balb rosbéothecail.
17. Íar nÁéd co n-ergnus ronfail
rogab Fergus mac Cellaich,
íar n-écaib Fergusa find
rí na hergnusa Ailill.
18. Dubinrecht mac Cathail chind
rogab athaich íar nAilill,
dar a éis, ní fúair fhachaid,
Dond crúaid cathach caem Chathaid.
19. Rogab Flathrói fuind co fraig
ríge dar éis Duind Chothaid,
d'éis meic Domnaill, ba marcach,
cathrí comlaind crúaid Artgal.
20. Rogab Tipraiti mac Taidc
dar éis Arttgail fháeburgairg,
íarum fúair duilgius in daig
Muirgius mór mac Tomaltaich.

-----

p.466

21. Díarmait íar Muirgius maith mór,
fúair tria chuibdius cach cáémslóg,
ardrí for drongaltaib den,
mac trén Tomaltaich Taillten.
22. Cathal mac Muirgiusa mind
dar éis Díarmata dúangrinn,
mo chumthach íar Cathul cháin
Murchad mac Áéda inmain.
23. Fergus mac Fothaid, feith lat,
d'éis mac Áéda, ba hadmat,
íar Fergus mór cen mire
Fínnachta lór Luibnige.
24. Conchobur inmain áege
d'éis flatha fir Formáéle,
íar n-éc flatha finn Fobair
rogab Áéd mac Conchobuir.
25. Cathal mac Conchobair chrúaid
íar ndíth Áéda Abratrúaid,
rí na mbard ón Chéis romchar,
rogab Tadc d'éis a athar.
26. Fergal mac Rúairgc ón Rige
rosgab cúaird ar cathmire,
fúair íar ndorchogud Fergail
Conchobur cáid cathbernaid.
27. Cathal mac Taidc tánic sunn
íar Conchobar na comlunn,
ferr ind athaich cen fhogail
flaith Chathail meic Conchobuir.
28. Tadgc mac Cathail, cumnich dam,
rogab íar n-éc a athar,
d'éis Taidgc rochuir cúaird Codail
Artt húa Rúairc in rígfhoraid.

-----

p.468

29. Íar nArt cháém críchi Codail
rogab Áéd húa Conchobair,
ba hí in rígi co rige,
flaithius fíre foirgclide.
30. Áéd mac Airtt íar nÁéd aile
rogab for Sairt sithgaile,
dar a éis, ba slúagrí sunn,
Rúaidrí mac Áéda acunn.
31. Domnall mac Tigernáin túi,
dar éis meic Áéda adnúi,
rí Domnann ós Braine bí
Domnall aile mac Rúaidrí.
32. Ó rosgab Nathí coa thaig,
nó Ailill co crí chobsaid,
nísrogaib ós Chliu chlemnach
óenfher bad fhiu Tairdelbach.
33. Tairdelbach, tuir Thulcha Óc,
his é in muir dar cach magrót,
a Dé, rothócba shhinni,
ardfhlaith Fótla foltfinne.
34. Húa Conchobuir Céisse crúi
dar éisse cach ríg rathnúi,
láéchrí luchair na lám nhgel,
rop suthain sunn in sáérfher!