Lizardi
Olerkiak 



ARRATS GORRI 
Zerk goibeltzen zaitu, maitea, arratsero,
aizea ta txoriak atertuz gero?
Begi zabalean zerk edatzen dizu
gandu delako ori, erdiz nigar ta izu? 
Eguna arrausi-nai asi-garaiean:
mendietako isla zeru - bazterrean
non gerezi ta non baxaran denean,
zerk atzi zakida, gaixo, bat-batean? 
Nireganuntz erne zenuan gogoa
zerk arinduz ta nork emanez egoa
dioakit iges, ta aidean esegi
dakust, txori lillurarazia iduri? 
Beldur naiz, enenno, arrats gorriotan
erio-oxkirria dabiltzun zainnetan;
Egun begi-urdin iltzer dagola-ta,
arengana zauden maitez ukitua... 
Begira: Izkain'eruntz, txingar borobilla
noiz egingo dago uretan murgila,
ta nozi txirtxir-otsez itsaso gorria
biurtuko lurrunezko odei zuria... 


(Maitagarri, betazal-ertzetan, oskorriak dirdai, nonbait malko-intzetan, ta mutillak, ipui bat asma ta dio laztanari len-poza itzul ba'lekio...) 


Egun begi urdin, sortu-berri artan,
lurraren gainnetik arroa zioan,
Innoren ume zanik ezpaitzekien,
il-ezintzat bere burua yo zuen. 
Eguerdiz gero, zalantza da, larri;
buru oraillean azkura du sarri;
atzera so, ta, illaunki, aldapa bera,
Gaua darraikio ludiaz yauntzera. 
Amil-mugan, bekaitz zimelak artu du;
amorruz damakio odei-sail bati su;
ta, aren argiz gaua galazi-ustetan,
murgil yo du buruz sarkalde-leizean. 
Gauaren aginduz, orra sua itzali,
Itz ok bota dizka Egun yoanari:
"Ai eguntxo txoro! ez ezagun ama,
Len uts sakonean Bakar nindukana?" 
Lurtarrok, ez beldur. Pake, maitaleak...
Altzoan dakartzit zorion-aleak...
Altzoan dakartzit izar ugariak,
etorkizun-egun berrien aziak... 
Ta, au esanik, lerden, ereitzen asi zan
aziak irraka sail beltz gizenean... 
Arrats gorria il da... Zeru-bazterrean
ez gerezi dugu, ez-ta are baxaran! 
Ipui gazigoxoak izan dik almen:
orra gandua urra ta nabari lurmen...
Begi zabaletan, irria nagusi;
giro-alda ain usurik ez dut ikusi! 
Izar urruneri begiak emanik
eztaietan biotzak ditutelarik,
elkarrenganako dituan Gauari
orra ixil-mintzoz zer dioten eskari: 
"Begi-beltz, oin-illaun, ama Gau naro,
ekarkor bekigu zure azaroa:
egun begi-urdin betoz ugariak
gure elkarmin onen gainnezkagarriak..."