Febo Vignoli (1920-1989) 

Famåus buratinèr, cunsidrè al miår Fasulén dla stòria, al'ucasiån l êra anc un poêta rafinè 

Famoso burattinaio, considerato il miglior Fagiolino della storia, all'occasione era anche un raffinato poeta.


Cavî nîgher
    
T arcôrdet, mamà, cla caslâza?  
Mo dî bän vècia quèl,
qualla al nuvantaquâtr int al Pradèl:
L'êra bän brótta,
però i tû fiû, là só,
pasénn na bôna pèrt ed zoventó.  

Mo che misêria! Però ai êra pió alîgher
parché té, mâma, t avêv i cavî nîgher.
E pó t cantèv t am parêv n usgnôl,
mé a t ascultèva con l amåur in côr.
 A t rimirèva dala tèsta ai pî
pinsànd: che bèla mâma ch'l'é la mî!  
Sé, i êren ténp brótt, mo ai êra alîgher
parché té, mâma, t avêv i cavî nîgher.  

I dsgósst, i patimént e i guâi pió pîs
I t fénn dvintèr in tèsta i cavî grîs.
Mo anc acsé a t rimirèva dala tèsta ai pî
pinsànd: che bèla mâma l'é la mî! 
 Al tänp al pâsa, an s fairma, l é dezîs,
anc i tû fiû i an méss di cavî grîs.  
E té, mî mèder, t ai n è amucè tant
che t è la tèsta tótta arcuêrta ed bianc.
Mo, pûr con cal tô bianc int i cavî,
a päns: che bèla mâma ch'l'é la mî!  

Mamà, i tû fiû i t vôlen bän tótt quant,
adès pió ed prémma, adès t è i cavî bianc.  

L'êra la zoventó ch'l'am fèva alîgher
quand, mâma, té t avêv i cavî nîgher.
 


--------------------------------------------------------------------------------