Una stòria nustrèna 

Quand la bacâja la dîs: i parpadlini, 
che venghi qui, che guardi, scuasadino, 
scadore, tirabusone, lo smalvino, ziribígoli, piccia, sburziglini. 

E pó: prilone, strizzo, gomisello, 
mostrighino, sgadizza, bazurlone, 
ratatuglia, stiatini, smataflone, 
sei un zavaglio, paciugo, trabadello. 

La dîs che il bolognese non fa fino, 
che secånnd lî l'é ròba da maichetti, 
insåmma, un ciacarèr da poveretti 
che i n an brîsa, come lî, un bel sitarino. 

A rôda lébbra, fagànd la traduziån, 
la dîs: tomelata e sgaravlare, 
hai la barusla, filucca, scudozzare, 
e al dvänta bordigone al burdigån. 

Adès la s é anc méssa a dir ochèi 
dscurdàndes d èser nèda int la Fundâza. 
La cradd d èsr ala môda, sta puvrâza, 
e con l inglais ai pèr ed vîver méi. 

Sô maré, un bån diavlâz, un lardarôl, 
l à truvè una muratta in Sant Isî 
e ògni tant al scâpa vî con lî 
par arsurères dla spåusa e däl såu gnôl. 

Ma l èter dé, con al tono dla spåusa 
ch'l'à dscuêrt la trascca, con l argói ufais, 
ala mòra l'à détt in bån bulgnais: 
"Mé a t scavàzz al cudrózz, brótta schivåusa!" 

E pó, d istént, dscurànd cómm a Bulåggna 
e sänza pió tradûsr in itagliàn 
l'à azónt, come s'la i déss un smataflån: 
"Vâca, scuénzia, zangâtla, trójja, caråggna!"