Oreste Trebbi

Autåur dla prémma metè dal Novzänt. Al fé dimónndi stûdi såura a Bulåggna e al scréss un sparvêrs ed quî. Qué a publicän Bulåggna la Grâsa, con la mêtrica quèsi d una narzisèta.

Autore della prima metà del Novecento. Compilò vari studi su Bologna e scrisse moltissime cose. Qui pubblichiamo "Bologna la Grassa", con la metrica che ricorda quella di una narcisata.


Bulåggna la Grâsa

Pr al vén ch'l é sinzêr e par l'âria ch'l'é fénna 
e con al sgugiôl d una bôna cusénna, 
con al tîra-tîra dla bèla dunatta, 
fand cånt d an savair ch'ai é anc la bulatta, 
e con al Zigànt ch'al se ftéss al'antîga 
e cla bôna amîga dla Tårr di Asnî, 
ai é la zänt ch'pâsa, 
ch'la dîs tótta in mâsa: 
la vétta l'é bèla in Bulåggna la Grâsa. 
Defâti, pinsànd al lasâgn, ai turtlén, parsótt, 
murtadèla e brasâdl ed ninén, 
pinsànd a chi vén ch'fan murîr i bigât, 
a zêrti pietànz ch'fan alchèr fén i piât, 
pinsànd a chi dsnèr ch'an s sà mâi s'i finéssen 
duv i é quî ch'padéssen pr an psair sluvazèr, 
tótt dîsn in sustanza salvànd la creanza: 
la vétta l'é bèla s'l'é pénna la panza! 
Mo quall ch'piès de pió, 
as capéss, i én äl dòn, 
ch'äli an däl fazatti ch'äl pèren madòn 
e zêrt ucén lósster ch'i fan äl falésster, 
che såul a guardèri as và fòra ed rigésster, 
che i n an pûc di spécc' 
anc se äl rédden vluntîra, 
ch'äl s ftéssn in manîra 
ch'i én tótt sicarnén, 
a vîver con låur as cånta pò äli åur: 
la vétta l'é bèla s'as pôl fèr l amåur! 
E acsé, tra l magnèr e tra l dòn i ptrugnàn 
i pâsn una vétta ch'fà invîdia ai suvràn: 
alîgher, cuntént, sänza méttres pensîr 
par quall ch'l é pasè e par quall ch'à da vgnîr 
a låur dla puléttica pôc ai inpôrta, 
i n vôlen ch'la s pôrta däl ciâcr e di guâi 
siché la zänt ch'pâsa la dîs tótta in mâsa: 
la vétta l'é bèla in Bulåggna la Grâsa!