Såtta al'Asnèla

Cómm s'a guardéss 
l'Asnèla ed såtta in só 
un prilån am fà 
pêrdr i sentimént.

A vadd luntàn 
äl tårr dla mî zitè: 
i pèren tant ûc' 
ch'i guèrden l urizånt 
cómm int al mèr 
fan i ûc' di sóttmarén.

Äli ånber vénnen zå 
insàmm ala sîra 
cruvànd arcôrd felîz 
sperànz d amåur 
dé trésst, lègrum e râbia 
dé d sudåur.

... Intànt la lónna 
col sô bianc lusåur 
l'à iluminè l'Asnèla 
un pô d travêrs.