TONINO GUERRA

Un gòzzal d'aqua 
[da: L'albero dell'acqua (dedicato soprattutto a Ezra Pound)]






Tótt' al vólti che da la Pènna
a vagh a Santarcànzal sla curira,
éulta Petraghéuda u i è una staziòun
abandunèda da zinquènt'an
senza piò al rudài davènti
indò ch'e' pasèva e' treno a scartamént ridótt
ch'l'avnéva sò da Rémin sla pózza de pèss
e pu e' turnèva sl'udòur dla móffa di furmai.

Ènca e' mi ba l'andéva sò e zò par la muntagna
próima se caval e dop s'un camiòun
ch'e' saltèva lòngh a la strèda pina ad béusi;
però s'e' féva la naiva e' muntèva se trenóin
e da chèsa nòsta Friz u i curéva incòuntra.

Mo piò di tótt da la curira a guèrd e' gabinòt
dri la staziòun cuért da una vóida americhèna
indò che i viazadéur i s ferméva a fè un gòzzal d'aqua.
I racòunta che un dopmezdè l'è smòunt un òm
nir comè e' carbòun e l'à dmand me chepstaziòun
un sgònd ad témp ch'l'eva bsògn da fè qualcósa alà dróinta.
Dop u s'è savéu ch'l'era e' poeta Pound
ch'l'era stè a Santa Maria d'Antóigh
una matóina intira tla cisa a guardè
la stètua ad Luca da la Robbia, da par léu.


[tratta da: Tonino Guerra, L'albero dell'acqua, Libri Scheiwiller, Milano, 1992 (A cura di Luca Cesari).]