AL FONDON


Apen' na pasé 'l pont dla ferovia
In dla Perma, dintorna a di gabion
A l'ombra d'un boschett fat ad gazia
L'acqua corenta l'ha scavé 'n fondon.
Cuand la stagion la cmenza a fer suder, 
Una mucha d' ragass i gh' va a noder.
Am' arcord ben, purtrop, un giovedí,
Giorn ad vacansa cl' era cmé na festa
L'era pasé da 'n ora 'l dop mezdí
Che 'l fondón l'era za tutta na testa.
A gh'era con nuetr anca Richen,
Brav ad noder e bon d' fer i testén.
Al steva semper sotta pr' un bel pess
Perché lú 'l seva molt a tgnir al fié.
Adesa l'é 'n po trop . . .-Co gh'é sucess?
Incora sotta? Quel gh'é capité!
Richen cla volta lí 'l n'é pu gnu su
E in dal fondón al gh´´e resté da lú.