La Diêta

- Dutåur, al mî problêma 
l é tótt alimentèr: 
a sån carsó quéng' chíllo 
e adès a i vrêv calèr. 

Par quasst, chèro dutåur, 
a vrê ch'l um sgnéss na diêta 
però cäl côs ch'i um pièsen 
l é inóttil ch'al m i viêta. 

-Gigén, méttet in tèsta 
ch'ai vôl quèlc sacrifézzi, 
t an psarè mâi cavèrtla 
soltànt con di artifézzi. 

Dånca: schèrta l albèna, 
vî tajadèl, turtlén, 
brudén sèt dé ala stmèna, 
mâi pió chèren d ninén. 

- Dutåur... con ste menú 
csa cràddel, che mé a vîva? 
L'ai srà a sta brótta diêta 
almànc n'alternatîva... 

- N'alternatîva? Sé... 
Gigén, ascåulta mò: 
o t mâgn dimónndi manc, 
opûr... chèga de pió!