Menna Elfyn



Blodau Gwylltion


*********

Tu ôl i'r barrau, bu'r barnwyr lleyg

yn cynnal llys. O'u blaen, y llestr

gwannaf un. Yn ffluro llys yr ychen.

Ond thâl hi ddim rhyfygu. Gwelant

mai di-enw flodyn wyf ymysg y crinllys,

yn ffugio codwarth diarth, a'r elinog

yn dringo ataf. Gwyra'r clychlys arnaf

a gweld na fum ynghrog. Ni'm cythrwyd

o lwyn. Theimlais i na llafn llaw dyn

ar wegil. Clawdd llonydd a ges.

Daw'r ddedfryd yn unfryd o sydyn. Nid dewr

ond dwl wyf. A dall. Yn fenyw na fyn na glöyn 

byw ar ei gwarthaf. Pa eneth a gollai sadyrnau

siawns ei neithdar a phleserau'r gwrych. pitiant

Sepalau mor sobr. Hwy o les eu cryman.

Di nodwydd fraich wyf. Heb fwgyn i gynnal poen.

na genynnau ar arlais. Cesail o gysgod a ges ymhlith

petalau a brofodd wayw corwynt a chraith.

Daeth awr i dystiolaethu,

sgriffian graffiti ar tabula rasa wal,

tri oabi hirgoes ynghanol meysydd paradwys -

dacw'r un rhudd mewn parêd yn dathlu'r lladd

er bod y gweirgloddau yn dal i ddiferu;

a dyma'r un gwyn a wisgaf yn asgwrn tangnefedd

bob tachwedd i herio holl adnoddau'r gad;

a dacw hi, myfi, y pabi Cymreig sy'n cuddio

ei bochau gan ddiffyg dewrder ei chlefyd melyn.

Aeth y barnwr allan, yn gwenu ar y pabi tawel,

ar frig ei dicter, at dusw crud yr awel.