Flora Gladue



Nanahihtamowin (Obedience)



**********


1.ê-piponiyik êsa pêyakwâw nimosôm pimâcihowak pêyak ôsisima asici. pwâmayî sîkwaniyik ê-nohtê-wanihikamawât wacaskwa. nimosôm êsa kakwêcimêw ôsisima ta- wîcihikot pêyakwâw iskwayâc ta-nitaw-nôcihcikêcik êkosi tâpwê ê-tâpwêhtahk. 

2. nânitaw nîstanaw itahtopiponêyiwa ôhi ôsisima. êkwa âta awa oskinîkiw ê- miywêhtahk ê-papâmi-wîcêwât omosôma, namôya tâpwê miywêyihtamawêw omosôma ê-ka-kî-cimoskêyit êkwa ê-nanoyâcisiskit. kisêyiniw awa kiskêyihtam piko mitoni kwayask ta-nâkatohkêt ôhi ôsisima. wiyahpitêwak otâpâhastimwa êkosi ê-sipwêtâpâsocik. 

3.ê-takohtêcik Gladue Lake, mâci-manokêwak. wâpahtamwak ôma ê-pê- yîkwaskwaniyik mîna piyêsiwa ê-pê-kâh-kitoyit, ati piyisk êkwa ita kâ-kapêsicik. êyako ê- tipiskâk kimiwan; kimiwaniyiw iskohk ê-wâpahk. 

4. kîkisêpâ êkwa ê-waniskâcik nimosôm asici ôsisima pot ôma, mitoni kî-sâpopêhcâw êsa misiwê. kahkiyaw kôna ê-tihkâpâwêt. mitoni koskwêyihtamwak asonê mistahi ê-kî- apiyit kôna kwayask mâmaskâtamwak. namôya nânitaw itâpatan êkwa ta-wanihikêcik. êkosi kiyâm kâwi mâci-wawêyîwak ê-wî-kîwêcik. 

5.mitoni cîpaya nîmihitoyiwa êyikohk ê-wâsê-nîmihitoyit ôma ê-tipiskâyik âsay kâ- pimi-kîwêcik. tastasâpiw nimosôm ê-kanawâpamât ôhi cîpaya, kisik ê-itât ôsisima, "nôsisim, ê-itwêhk ôma mâna cîpayak kâ-nîmihitocik, namôya ta-kîskosîmât awiyak." 

6. namôya ôma kinwês êkosi ê-pîkiskwêt nimosôm, âsay ôsisima kâ-kîskosîyit, Phweet! "kâwiya nôsisim!" itêw nimosôm ê-misi-tohkâpit, êyikohk ê-koskohikot ka-tôtamiyit ôhi ôsisima. ê-kâh-kanawâpamât cîpaya, nimosôm kâ-moyêyimât ôhi cîki ê-pê-nîmihitoyit; kisik ê-pêhtâkosicik ispî cîki ê-pê-ayâyit.

7. Phweet! âsay mîna ka-kîskosît awa oskinîkiw. namôya nânitaw êkwa itwêw nimosôm mâka nawakiskwêyiw kisik mitoni ê-nawakît ita kâ-nîpawit ôma. tânisi êkwa kê- ispayik itêyihtam ôma. mitoni êkwa cîki nayiwac ostikwâniwâhk ôhi cîpaya. ohpiskwêyiw nimosôm, kâ-wâpahtahk ê-mihkonâkwaniyik kîkway, tâskôc pêyakwan mihko. kîkway kisik ê-pêhtâkwahk, tâskôc yôtin, ê-pimiyowêk misiwê wâsakâm êkota k-âyâcik. 

8. otinam omaskimot mohcihk ohci êkota nimosôm ê-asowâtêyik wîhkask êkwa omistikwaskihkwa. âpaham omaskimot ê-otinahk anima wîhkask êkwa kocawâkanisa. nimosôm êkwa saskaham kocawâkanis mîna anima wîhkask. mistikwaskihkwa êkwa otinêw ê-wâh-wâskânât ê-miyahkaswât kwayask.

9.pâh-pakamahwêw mistikwaskihkwa tâskôc kîsâstaw pâh-pascîs. êkosi nimosôm tastakiskwêyiw kisik ê-kâkîsimot. ê-kî-kâkîsimot êkwa mâci-nikamow. kâh-kihtwâm kotaka nikamona sipwêham kinwêsîs piyisk ati. kâ-nikamot ôma, ati pôni-nôkosiyiwa piyisk ôhi cîpaya. êkosi êkwa wawêyîwak, êkota ohci kîwêyâcihowak âsay mîna. 

10. nimosôm mîna ôsisima êkwa mitoni kiyâmêwisiwak misâkami k-âti-ka-kîwêcik. namôya kinwês êkota ohci kâh-kî-nitaw-nôcihcikêcik anima, êsa ôsisima mitoni kî-ati-misi- ahkosiyiwa. ê-takwâkiniyik, nânitaw nisto pîsim êkota ohci kâ-kî-ati-nakataskît ana oskinîkiw esa.